जयपति ढकाल, कार्तिक । हुम्लाको खार्पुनाथ गाउँपालिका–४का स्थानीय सोभन रावतको घरमा मंगलबार साँझ करिब ७ बजे अचानक लागेको भीषण आगलागीले क्षणभरमै पूरा घर जलेर खरानी भएको छ। यो घटनाले रावत परिवार पूर्ण रूपमा घरविहीन बनेको छ। अझ दुःखद कुरा— घरमा दुई साना बालबालिका समेत रहेका कारण परिवार अहिले थप संकट र त्रासको अवस्थामा छ।
घरभित्रका सबै लत्ताकपडा, खाद्यान्न, कागजात, औजार र जीवनभरको संचय केही मिनेटमै नष्ट भएपछि परिवार खुलेआकाशमुनी रात बिताउन बाध्य भएको स्थानीयले बताएका छन्। कठोर हिमाली जाडो बढ्दै गएको अवस्थामा— दुई साना बालबालिका सहितको परिवारका लागि यो अवस्था अत्यन्त पीडादायी बनेको छ।
दुर्गम भेग, अपर्याप्त साधन तथा उद्धारसम्बन्धी उपकरणको अभावका कारण आगो नियन्त्रणमा ल्याउने प्रयास स्थानीयहरूले गरे पनि क्षति रोक्न सकिएन। अहिले परिवारसँग न टेकेर बस्ने घर छ, न भोलिका दिनका लागि खाद्यान्न— पूर्ण असहाय स्थितिमा जीवन धान्न कठिन भएको छ।
यस भयावह अवस्थालाई मध्यनजर गर्दै स्वदेश तथा विदेशमा रहनुहुने सम्पूर्ण दातृ मनहरूमा हार्दिक अपिल गरिएको छ—
“एक सहयोगले दुई साना बालबालिका सहितको एउटा परिवारलाई फेरि जिउन आधार मिल्छ।”
तत्काल टेन्ट, लत्ताकपडा, खाद्यान्न, अत्यावश्यक सामग्री र आर्थिक सहयोगको अत्यन्त आवश्यकता रहेको छ।
“सेवा नै धर्म हो” भन्ने भावनासहित सहयोगका हातहरू अगाडि बढाइदिन सबैमा विनम्र अनुरोध छ।
आगोले घर खरानी बनायो, तर तपाईंको सहयोगले भविष्य फेरि उठाउन सक्छ।
