नेपालगञ्ज । करदाता सेवाको पहुँच गाउँस्तरसम्म विस्तार गर्ने उद्देश्यले आन्तरिक राजस्व कार्यालय नेपालगञ्ज र नरैनापुर गाउँपालिकाबीच समझदारीपत्र (MoU) मा हस्ताक्षर भएको छ। समझदारी कार्यान्वयनमा आएसँगै नरैनापुरका नागरिक तथा व्यवसायीले करसम्बन्धी विभिन्न सेवा लिन नेपालगञ्जसम्म धाउनुपर्ने बाध्यता घट्ने भएको छ।
नेपाल सरकारको निर्णयअनुसार आन्तरिक राजस्व कार्यालयबाट उपलब्ध हुँदै आएका केही करदाता सेवाहरू स्थानीय तहबाटै प्रवाह गर्ने व्यवस्थाअन्तर्गत समझदारी गरिएको हो। यसले विशेषगरी ग्रामीण तथा सीमावर्ती क्षेत्रका करदातालाई प्रत्यक्ष राहत पुग्ने अपेक्षा गरिएको छ।
समझदारीअनुसार नरैनापुर गाउँपालिकाले व्यक्तिगत तथा व्यावसायिक स्थायी लेखा नम्बर (PAN) प्राप्त गर्ने प्रक्रियामा सहजीकरण गर्नेछ। त्यस्तै, मूल्य अभिवृद्धि कर (VAT) मा दर्ता तथा अन्तःशुल्क इजाजतपत्रका लागि आवश्यक कागजात मिलान गरी आन्तरिक राजस्व कार्यालय नेपालगञ्जमा सिफारिस गर्ने व्यवस्था गरिएको छ।
करदाताले आवश्यक पर्ने करसम्बन्धी प्रमाणपत्र प्राप्त गर्न तथा करदाता दर्ताका विवरण संशोधन गर्नुपरेमा समेत गाउँपालिकाले आवश्यक सहजीकरण गर्नेछ। स्थानीय तहबाट समाधान हुन नसक्ने विषय भने सम्बन्धित आन्तरिक राजस्व कार्यालयमा सिफारिस गरिनेछ।
अब करसम्बन्धी जानकारीका लागि पनि गाउँमै पहुँच विस्तार हुने भएको छ। आन्तरिक राजस्व कार्यालय नेपालगञ्ज र गाउँपालिकाको समन्वयमा आयकर, VAT, अन्तःशुल्क तथा कर कानुनबारे करदाता शिक्षा र अन्तरक्रिया कार्यक्रम सञ्चालन गरिनेछ।
स्थानीय तहबाट प्रदान गरिने सेवाहरू आन्तरिक राजस्व विभागको ‘Integrated Tax System’ मार्फत तोकिएको कार्यविधिअनुसार सञ्चालन हुनेछन्। प्रणाली सञ्चालनका लागि आवश्यक User ID र Password सम्बन्धित कर्मचारीलाई उपलब्ध गराउने तथा सेवा प्रवाह प्रभावकारी बनाउन दुवै पक्षले एक–एक जना Focal Person तोक्ने व्यवस्था गरिएको छ।
समझदारीले सेवा विकेन्द्रीकरणसँगै कर प्रशासन र स्थानीय सरकारबीचको समन्वयलाई पनि संस्थागत गर्ने देखिएको छ। विशेषगरी कर कार्यालयसम्म पुग्न समय र खर्च व्यहोर्नुपर्ने अवस्थाको अन्त्य गर्दै करदाता सेवाको पहुँच नागरिकको घरदैलोनजिक पुर्याउने प्रयासका रूपमा यसलाई हेरिएको छ।
महत्वपूर्ण पक्ष के छ भने स्थानीय तहबाट उपलब्ध गराइने यी कर सेवाका लागि संघीय राजस्वमा दाखिला गर्नुपर्ने कर तथा शुल्कबाहेक थप सेवा शुल्क वा दस्तुर लिन पाइने छैन। यसले करदातामाथि अनावश्यक आर्थिक भार थपिन नदिने व्यवस्था गरेको छ।
समझदारीपत्रमा आन्तरिक राजस्व कार्यालय नेपालगञ्जका प्रमुख कर अधिकृत पूर्ण प्रसाद न्यौपाने र नरैनापुर गाउँपालिकाका प्रमुख प्रशासकीय अधिकृत नवराज वलीले हस्ताक्षर गरेका छन्। समझदारी कार्यान्वयनसँगै नरैनापुरमा कर सेवा, कर सचेतना र कर प्रशासनबीचको सम्बन्ध थप प्रत्यक्ष बन्ने अपेक्षा गरिएको छ।
