सुर्खेत । खाद्य प्रविधि तथा गुण नियन्त्रण कार्यालय, सुर्खेतले वीरेन्द्रनगरमा खाद्य प्रशोधन प्रविधि सम्बन्धी ४ दिने तालिम कार्यक्रम सफलतापूर्वक सम्पन्न गरेको छ। तालिम मिति २०८२/१०/११ देखि २०८२/१०/१४ सम्म सञ्चालन गरिएको हो।
तालिममा कृषक तथा उद्यमीहरूलाई आलुको चिप्स, भटमासको तोफु, टमाटरको सस, चटनी सस, सुन्तलाको स्क्वास, मिक्स अचार, फलफूलको जुस तथा तरकारी संरक्षण सम्बन्धी शैद्धान्तिक र व्यावहारिक प्रशिक्षण प्रदान गरिएको आयोजकले जनाएको छ।
कार्यक्रममा उत्पादन तथा प्रशोधनका क्रममा अपनाउनुपर्ने खाद्य स्वच्छता, गुणस्तर मापदण्ड, प्याकेजिङ, लेबलिङ र मूल्य निर्धारण सम्बन्धी कक्षाहरू समेत समावेश गरिएको थियो।
१६ जना प्रशिक्षार्थीको सहभागिता
तालिममा मुगुबाट २ जना, दैलेखबाट २ जना र सुर्खेतबाट १२ जना गरी जम्मा १६ जना प्रशिक्षार्थीहरू सहभागी भएका थिए।
तालिमका कक्षाहरू निमित्त कार्यालय प्रमुख श्री सन्तोष दाहाल, खाद्य अनुसन्धान अधिकृत श्री कपिल सुवेदी, तथा प्राविधिक सहायकहरू रचना लामिछाने, लक्ष्मी ढकाल, सन्तोष घिमिरे र अनुज सापकोटाले सञ्चालन गरेका थिए।
साथै सहभागीहरूलाई खाद्य स्वच्छता तथा गुणस्तर ऐन, २०८१ अन्तर्गतका प्रावधानहरूको विषयमा जानकारी गराइएको थियो।
समापन समारोहमा विशिष्ट उपस्थिति तालिमको समापन समारोह मिति २०८२/१०/१४ गते कार्यालय सभाहलमा सम्पन्न भएको थियो।
समारोह निमित्त कार्यालय प्रमुख श्री सन्तोष दाहालको अध्यक्षतामा सम्पन्न भएको हो भने प्रमुख अतिथिका रूपमा सुर्खेतका सहायक प्रमुख जिल्ला अधिकारी डिल बहादुर कार्की तथा विशेष अतिथिका रूपमा कर्णाली प्रदेश भूमि व्यवस्था, कृषि तथा सहकारी मन्त्रालयका उपसचिव श्री तिलक प्रसाद पाण्डेको उपस्थिति रहेको थियो।
किसानलाई नयाँ उत्पादनमा प्रोत्साहन
तालिम सहभागीहरूले कृषकहरूले उत्पादनको उचित मूल्य नपाउने तथा संरक्षणमा समस्या भोगिरहेको अवस्थामा खाद्य प्रशोधनमार्फत नयाँ उत्पादन विकास गर्न प्रेरणा मिलेको बताएका छन्।
उनीहरूले यस्ता तालिमले किसानलाई उद्यमशील बनाउँदै आत्मनिर्भरता बढाउने उल्लेख गर्दै आयोजक कार्यालयप्रति धन्यवाद व्यक्त गरेका थिए।
अतिथिहरूको जोडः स्वच्छ र गुणस्तरीय उत्पादन
विशेष अतिथि उपसचिव तिलक प्रसाद पाण्डेले तालिमले कर्णाली प्रदेशमा उद्यम विकासमार्फत आयआर्जन वृद्धि हुने विश्वास व्यक्त गर्दै आगामी दिनमा कार्यक्रमलाई अझ विस्तार गरिने बताए।
प्रमुख अतिथि सहायक प्रमुख जिल्ला अधिकारी डिल बहादुर कार्कीले सिकेको सीप व्यवहारमा उतार्दै स्वच्छ तथा गुणस्तरीय खाद्य उत्पादनमा जोड दिन आग्रह गरे।
कार्यक्रमको अन्त्यमा अध्यक्ष सन्तोष दाहालले सहभागीहरूलाई धन्यवाद दिँदै खाद्य स्वच्छता तथा गुणस्तर ऐन, २०८१ अनुसार स्वच्छ खाद्य उत्पादन सबै सरोकारवालाको साझा दायित्व भएको उल्लेख गरे।
