नेपालगञ्ज । नेपाल सरकारको संघीय अस्पतालका रूपमा रहेको सुशील कोइराला प्रखर क्यान्सर अस्पतालको वृहत्तर हित, भौतिक पूर्वाधार विकास, सेवा विस्तार तथा सेवा सुदृढीकरणका लागि संघ, प्रदेश र स्थानीय सरकारबीचको सहकार्य तथा समन्वयलाई थप प्रभावकारी बनाउँदै अस्पताल व्यवस्थापन अगाडि बढेको छ।
अस्पतालको समग्र विकास र सेवा विस्तारका लागि विभिन्न स्थानीय तहका जनप्रतिनिधि, सरोकारवाला निकाय तथा संघ–संस्थासँग निरन्तर संवाद, समन्वय र सहकार्यको पहल भइरहेको अस्पतालले जनाएको छ। अस्पतालका आवश्यकता, सम्भावना तथा दीर्घकालीन विकासका विषयमा सम्बन्धित निकायसँग छलफल गर्दै उपलब्ध स्रोत–साधनको अधिकतम उपयोग गर्ने दिशामा व्यवस्थापनले प्राथमिकता दिएको छ।
यसैक्रममा लुम्बिनी प्रदेश सरकारका भौतिक पूर्वाधार मन्त्री माननीय रत्न खत्रीले यसअघि अस्पतालको स्थलगत भ्रमण गरी अस्पतालको भौतिक पूर्वाधार, विद्यमान अवस्था तथा आगामी विकासका आवश्यकताबारे जानकारी लिनुभएको थियो।
उक्त स्थलगत भ्रमण तथा त्यसक्रममा भएका छलफललाई थप अगाडि बढाउँदै २०८३ साल साउन २९ गते भौतिक पूर्वाधार मन्त्रालयमा मन्त्री माननीय रत्न खत्री र सुशील कोइराला प्रखर क्यान्सर अस्पतालका कार्यकारी निर्देशक डा. निरज भट्टराईबीच भेटघाट तथा विशेष छलफल भएको हो।
भेटघाटका क्रममा अस्पतालको भौतिक पूर्वाधार विकास, आवश्यक संरचना निर्माण, सेवा विस्तार, क्षमता अभिवृद्धि तथा दीर्घकालीन विकासका लागि प्रदेश सरकारसँग गर्न सकिने सहकार्यका सम्भावनाबारे विस्तृत छलफल भएको थियो।
संघीय सरकारअन्तर्गत सञ्चालित अस्पताल भए पनि अस्पतालको वृहत्तर हित र विकासलाई केन्द्रमा राख्दै प्रदेश तथा स्थानीय सरकारसँग नजिक रहेर आवश्यक सहकार्य र समन्वय गर्ने नीति अस्पताल व्यवस्थापनले अघि सारेको छ। यस प्रकारको समन्वयले अस्पतालको विकासका लागि उपलब्ध स्रोत, साधन र सम्भावनाको प्रभावकारी परिचालनमा थप सहयोग पुग्ने अपेक्षा गरिएको छ।
अस्पतालका कार्यकारी निर्देशक डा. निरज भट्टराईले अस्पतालको सेवा विस्तार, भौतिक पूर्वाधार विकास तथा संस्थागत सुदृढीकरणका लागि संघ, प्रदेश र स्थानीय तहका सरकार, जनप्रतिनिधि, संघ–संस्था तथा सम्पूर्ण सरोकारवालासँग सहकार्य गर्दै अघि बढ्ने प्रतिबद्धता व्यक्त गर्नुभएको छ।
कर्णाली, लुम्बिनी तथा सुदूरपश्चिमलगायत पश्चिम नेपालका नागरिकलाई विशेषज्ञ क्यान्सर उपचार सेवा प्रदान गर्दै आएको अस्पतालको क्षमता र पहुँच विस्तारका लागि आगामी दिनमा थप योजनाबद्ध पहल गरिने अस्पताल व्यवस्थापनले जनाएको छ।
अस्पतालको वृहत्तर विकासका लागि संघीय अस्पतालका रूपमा रहेको आफ्नो संरचनागत दायित्वलाई प्रभावकारी रूपमा अघि बढाउँदै प्रदेश तथा स्थानीय सरकारको सहयोग, सहकार्य र समन्वयलाई समेत प्राथमिकतामा राखेर अगाडि बढ्ने अस्पताल व्यवस्थापनको तयारी छ।
