मुगु, असोज ४ । मुगुको सोरु गाउँपालिका–३, भिईमा परापूर्वकालदेखि चलिआएको धार्मिक तथा सांस्कृतिक महत्व बोकेको नवमी मेला २०८३ भव्य रूपमा सम्पन्न भएको छ। मेलामा कर्णाली प्रदेशका मुख्यमन्त्री मंगल बहादुर शाहीसहित १० हजारभन्दा बढी श्रद्धालु तथा दर्शक सहभागी भएका छन्।
गुरादेवको धार्मिक आस्था र कर्णालीको मौलिक संस्कृति झल्कियो
मुगु, हुम्ला, जुम्ला र बाजुरालगायत जिल्लाबाट श्रद्धालुको सहभागिता
गुरादेव देउताको पैडका रूपमा विशेष धार्मिक महत्व राख्ने नवमी मेलामा मुख्यमन्त्री शाहीको समेत उपस्थिति रहेको थियो। स्थानीयवासी तथा आयोजकले उहाँलाई भव्य स्वागत गरेका थिए।
मेलामा संविधान सभा सदस्य नमराम धामी, सोरु गाउँपालिका अध्यक्ष धर्म बहादुर शाही, उपाध्यक्ष केसर बहादुर शाहीलगायत जनप्रतिनिधि, स्थानीयवासी तथा विभिन्न जिल्लाबाट आएका १० हजारभन्दा बढी श्रद्धालु तथा दर्शकको सहभागिता रहेको आयोजकले जनाएको छ।
नवमी मेला धार्मिक आस्थासँगै कर्णाली क्षेत्रको मौलिक कला, संस्कृति र परम्पराको संरक्षण तथा प्रदर्शन गर्ने महत्वपूर्ण अवसरका रूपमा समेत लिइन्छ। मेलामा मुगु, हुम्ला, जुम्ला, बाजुरालगायत जिल्लाबाट आएका सहभागीले विभिन्न मौलिक कला तथा सांस्कृतिक प्रस्तुति दिएका थिए।
दमाहा, सनाई र नर्सिङसँगै धामी नाच
मेलामा दमाहा नाच, सनाई, नर्सिङलगायत परम्परागत बाजागाजा प्रस्तुत गरिएको थियो। विभिन्न स्थानबाट आएका धामीहरूले धामी नाचसमेत प्रस्तुत गरेका थिए।
गुरादेवलाई भेट्न आएको विश्वास गरिने भुवानी देउता, धल्पुरा देउता, समैजु देउता र बिजै देउता लगायत विभिन्न देवताका धामीहरूको समेत मेलामा उपस्थिति रहेको थियो।
ठूलो भीड व्यवस्थापन चुनौती
मेलामा ठूलो संख्यामा श्रद्धालु तथा दर्शक सहभागी भएपछि भीड व्यवस्थापन चुनौतीपूर्ण बनेको स्थानीयले बताएका छन्।
सोरु गाउँपालिका अध्यक्ष धर्म बहादुर शाहीले ठूलो जनसहभागिता हुने धार्मिक तथा सांस्कृतिक मेलाको व्यवस्थापनमा स्थानीय समुदाय र सरोकारवाला निकायको प्रभावकारी परिचालन आवश्यक रहेको बताउनुभयो।
उहाँका अनुसार व्यवस्थापनमा कमी हुँदा सहभागी तथा स्थानीयबाट गुनासो आउने भएकाले आगामी दिनमा मेलालाई थप व्यवस्थित बनाउनुपर्ने आवश्यकता छ।
खानेपानी अभाव प्रमुख समस्या
मेलामा सहभागी स्थानीय तथा बाहिरबाट आएका श्रद्धालुले खानेपानीको अभावलाई प्रमुख समस्याका रूपमा औँल्याएका छन्।
मेलास्थल आसपास पर्याप्त खानेपानीको स्रोत नभएकाले ठूलो संख्यामा मानिस भेला हुँदा खानेपानीको समस्या थप बढ्ने स्थानीयको भनाइ छ।
स्थानीय प्रेमबहादुर बुमीले दीर्घकालीन रूपमा समस्या समाधान गर्न कर्णाली नदीबाट लिफ्ट प्रणालीमार्फत खानेपानी ल्याउने व्यवस्था गर्नुपर्ने बताउनुभयो।
सुरक्षा, सरसफाइ र स्वास्थ्य सेवालाई प्राथमिकता दिन माग
हरेक वर्ष मुगु, हुम्ला, जुम्ला, बाजुरालगायत जिल्लाबाट ठूलो संख्यामा श्रद्धालु आउने भएकाले आगामी दिनमा मेलाको व्यवस्थापनलाई थप व्यवस्थित बनाउन स्थानीयले माग गरेका छन्।
स्थानीयका अनुसार मेलाको धार्मिक तथा सांस्कृतिक महत्व संरक्षण गर्दै खानेपानी, सुरक्षा, सरसफाइ, स्वास्थ्य सेवा, यातायात तथा भीड व्यवस्थापनलाई प्राथमिकताका साथ अघि बढाउन आवश्यक छ।
