ललितपुर,-३४औँ विश्व मानसिक स्वास्थ्य दिवसको अवसरमा ललितपुरको कुपण्डोलस्थित होटल संस्कार फाइन डाइनमा मानसिक स्वास्थ्य सचेतना, कला, संवाद, पहिचान र सामुदायिक सशक्तीकरणलाई समेट्दै विविध कार्यक्रम सम्पन्न भएको छ।
क्वयेर युथ ग्रुप , ब्लेस फाउन्डेसन नेपाल तथा प्रोजेक्ट ग्रीन सर्कलको संयुक्त आयोजनामा सम्पन्न कार्यक्रममा ६० जनाभन्दा बढीको सहभागिता रहेको थियो। कार्यक्रममा ‘पहिचान र प्रतिवाद’ पुस्तक विमोचन, खुला सहभागितामूलक कार्यक्रम (ओपन कल इभेन्ट), मानसिक स्वास्थ्य कार्यशाला तथा पाँच जना अतिथिको सहभागितामा प्यानल छलफल आयोजना गरिएको थियो।
कार्यक्रमअन्तर्गत ३० जना व्यक्तिलाई आर्ट थेरापी प्रदान गरिनुका साथै क्यानभासमा चित्र बनाउने सिर्जनात्मक गतिविधि सञ्चालन गरिएको थियो। सहभागीहरूलाई स्टिकर, डिजाइन सामग्री तथा क्लिप वितरण गरिएको थियो। साथै, मानसिक स्वास्थ्य, आत्मअभिव्यक्ति र सकारात्मक सोचलाई प्रोत्साहन गर्ने उद्देश्यले पुस्तक शतप्रतिशत निःशुल्क वितरण गरिएको थियो।
कार्यक्रमको अर्को महत्त्वपूर्ण पक्ष ‘पहिचान र प्रतिवाद’ पुस्तक विमोचन थियो। लेखिका तथा कार्यक्रम प्रस्तोता बिन्दु परियारद्वारा लिखित उक्त पुस्तकमा यौनिक तथा लैङ्गिक अल्पसङ्ख्यक समुदायका आठ जना प्रेरणादायी व्यक्तित्वका जीवन सङ्घर्ष र सफलताका कथा समेटिएका छन्। कार्यक्रममा नील हिरा समाजकी पूर्वअध्यक्ष पिङ्की गुरुङले प्रेरणादायी मन्तव्य व्यक्त गर्दै आत्मसम्मान, सामाजिक स्वीकार्यता र समुदायको सशक्तीकरणमा जोड दिनुभयो।
कार्यक्रममा क्वयेर युथ ग्रुपकी निर्देशक तथा ब्लेस फाउन्डेसन नेपालकी संस्थापक अध्यक्ष बिमला श्रेष्ठ, क्वयेर युथ ग्रुपको अध्यक्ष सफल लामा तथा कार्यक्रम संयोजक पुजन गौतमलगायत विभिन्न सङ्घसंस्थाका प्रतिनिधि, अधिकारकर्मी, युवा नेतृत्व र समुदायका अग्रजहरूको उपस्थिति थियो।
कला, संवाद, साहित्य र सामूहिक सहभागितामार्फत मानसिक स्वास्थ्यप्रतिको सचेतना अभिवृद्धि गर्नुका साथै पहिचान, समानता र समावेशिताको सन्देश प्रवाह गर्दै कार्यक्रम सम्पन्न भएको हो।
आयोजक: क्वयेर युथ ग्रुप,ब्लेस फाउन्डेसन नेपाल तथा प्रोजेक्ट ग्रीन सर्कल।
