जयपति ढकाल हुम्ला -आसन्न फागुन २१ गते हुने प्रतिनिधिसभा निर्वाचनका लागि हुम्लाबाट नेकपा एमालेले दल फडेरालाई उम्मेदवारका रूपमा अगाडि सारेको छ। विकास, समृद्धि र जनताको समस्या सिधै संघीय राजधानीसम्म पुर्याउने निडर नेतृत्वका रूपमा चिनिएका फडेराले घरदैलो तथा प्रत्यक्ष संवाद अभियानलाई तीव्र बनाउँदै जनमत सुदृढ गर्दै जानुभएको छ।
हुम्लाका दुर्गम गाउँबस्तीमा पुगेर स्थानीय नागरिकसँग प्रत्यक्ष संवाद गर्दै उम्मेदवार फडेराले सडक, स्वास्थ्य, शिक्षा, खाद्य सुरक्षा र रोजगारी हुम्लाको मुख्य चुनौती भएको उल्लेख गर्नुभएको छ। “हुम्लाको पीडा भाषणमा होइन, बजेट र नीतिमा देखिनुपर्छ,” उहाँको स्पष्ट भनाइ छ। यही उद्देश्यका साथ उहाँले संसद र सरकारसमक्ष हुम्लाका मुद्दा निर्भीक रूपमा उठाउँदै आएको दाबी गर्नुभयो।
नेकपा एमालेको संगठनात्मक शक्ति, स्पष्ट नीति र विकासमुखी दृष्टिकोण नै हुम्लाको समृद्धिको आधार भएको फडेराको धारणा छ। उहाँले एमाले नेतृत्वमा मात्र हिमाली जिल्लाको दीर्घकालीन विकास सम्भव हुने उल्लेख गर्दै जनतालाई विकास र स्थायित्वका पक्षमा मतदान गर्न अपिल गर्नुभएको छ।
एमाले उम्मेदवार फडेराले भावनात्मक राजनीति होइन, परिणाम देखिने काम नै आफ्नो पहिचान भएको बताउँदै हुम्लालाई राष्ट्रिय विकासको मूलधारमा जोड्न आफू प्रतिबद्ध रहेको स्पष्ट पार्नुभयो। “हुम्लाको आवाज दबिन दिन्न, राजधानीमा हुम्लाको मुद्दा गुञ्जिनै पर्छ,” उहाँले जोड दिनुभयो।
फागुन २१ को निर्वाचन नजिकिँदै गर्दा हुम्लामा एमाले उम्मेदवार दल फडेराको आक्रामक र स्पष्ट चुनावी अभियानले राजनीतिक माहोल थप तातिएको छ। विकास, स्थायित्व र मजबुत नेतृत्वको विकल्पका रूपमा दल फडेरालाई हेरिएको एमालेको दाबी छ।
