मुगु । सोरु गाउँपालिकामा बालबालिका तथा अपाङ्गता भएका व्यक्तिको अधिकार, शिक्षा, स्वास्थ्य, सरसफाइ र सामाजिक समावेशीकरणका क्षेत्रमा जेएसएस नेपालले सञ्चालन गर्दै आएका कार्यक्रम तथा आगामी कार्ययोजनाबारे छलफल गरिएको छ।
आज २०८३ साल भदौ ९ गते वडा अध्यक्ष कुलचन्द जैसीको अध्यक्षतामा सम्पन्न बैठकमा जेएसएस नेपालले सोरु गाउँपालिकाभरि सञ्चालन गर्दै आएको कार्यक्रमको समीक्षा तथा आगामी योजनाका विषयमा छलफल भएको हो।
बैठकमा जेएसएस नेपालले स्थानीय भौगोलिक अवस्था र समुदायको आवश्यकतालाई मध्यनजर गर्दै बालबालिकाको क्षेत्रमा विभिन्न कार्यक्रम सञ्चालन गर्दै आएको जानकारी गराइएको थियो। विशेषगरी बाल क्लब तथा बाल संगठनलाई सक्रिय बनाउने, बालबालिकामा सरसफाइसम्बन्धी चेतना अभिवृद्धि गर्ने तथा विद्यालय बाहिर रहेका बालबालिकालाई पुनः विद्यालयमा ल्याउन प्रेरित गर्ने कार्य भइरहेको जनाइएको छ।
त्यसैगरी, अपाङ्गता भएका व्यक्तिहरूको हकहित संरक्षण तथा क्षमता विकासका लागि उपचार, शिक्षा तथा आवश्यक सहयोग उपलब्ध गराउने कार्यक्रम सञ्चालन भइरहेको बैठकमा जानकारी दिइएको थियो। उनीहरूको स्वास्थ्य, शिक्षा र सामाजिक सहभागिता अभिवृद्धि गर्दै आत्मनिर्भर बनाउन सहयोग गर्ने उद्देश्य रहेको जनाइएको छ।
जेएसएस नेपालका कार्यक्रमहरू सोरु गाउँपालिकाका विभिन्न वडामा सञ्चालन भइरहेको र संस्थाको कार्यक्रमलाई थप तीन वर्ष निरन्तरता दिने गरी म्याद थप गर्ने निर्णय समेत भएको बताइएको छ। संस्थाले वडा तहमा बाल संगठन समिति गठन गरी बालबालिकाको सहभागिता, अधिकार संरक्षण तथा नेतृत्व विकासमा समेत जोड दिएको छ।
बाल संगठनका अध्यक्ष धनराज जैसीले बालबालिकाको अधिकार, शिक्षा, स्वास्थ्य, सरसफाइ तथा नेतृत्व विकासका क्षेत्रमा जेएसएस नेपालले गर्दै आएको सहयोगले स्थानीय बालबालिकामा सकारात्मक परिवर्तन ल्याउन महत्वपूर्ण भूमिका खेलेको बताए। उनले बालबालिकाका सवालमा स्थानीय सरकार, विद्यालय, अभिभावक तथा सामाजिक संस्थाबीचको सहकार्यलाई थप प्रभावकारी बनाउनुपर्नेमा जोड दिए।
बैठकले बालबालिका तथा अपाङ्गता भएका व्यक्तिका सवाललाई स्थानीय विकासको प्राथमिकतामा राख्दै आगामी दिनमा कार्यक्रमलाई अझ प्रभावकारी र परिणाममुखी बनाउने आवश्यकता औँल्याएको छ।
