जयपति ढकाल-आगामी फागुन २१ गते हुने प्रतिनिधिसभा सदस्य निर्वाचनका लागि मुगु जिल्लामा विभिन्न सात राजनीतिक दलका उम्मेदवारहरूले उम्मेदवारी दर्ता गराएका छन्। मुख्य निर्वाचन अधिकृतको कार्यालयमा तोकिएको समयभित्र उम्मेदवारी दर्ता भएसँगै जिल्लामा चुनावी माहोल तातिएको छ।

निर्वाचन अधिकृतको कार्यालयका अनुसार मंगलबार बिहानदेखि नै दलका नेता, कार्यकर्ता तथा समर्थकहरूको बाक्लो उपस्थिति देखिएको थियो। बाजागाजा, नाराबाजी र पार्टीका झण्डासहित उम्मेदवारहरूलाई साथमा लिएर दलहरू कार्यालयमा पुगेर उम्मेदवारी दर्ता गराएका थिए। शान्ति सुरक्षाका लागि नेपाल प्रहरी र सशस्त्र प्रहरी बलको विशेष व्यवस्था गरिएको थियो।

यसपटक मुगु जिल्लाबाट उम्मेदवारी दर्ता गराउने दल तथा उम्मेदवारहरू यसप्रकार छन्–

नेपाली कम्युनिस्ट पार्टीबाट चन्द्रबहादुर शाही, नेपाली कांग्रेसबाट खडकबहादुर शाही, नेकपा एमालेबाट पूर्णबहादुर रोकाया, राष्ट्रिय स्वतन्त्र पार्टी (रास्वपा) बाट भुवन टमाटा, नेत्रविक्रम चन्द ‘विप्लव’ नेतृत्वको नेकपा माओवादीबाट संगम परियार, राष्ट्रिय प्रजातन्त्र पार्टी (राप्रपा) बाट बलबहादुर मल्ल तथा प्रगतिशील लोकतान्त्रिक पार्टी (प्रलोपा) बाट ऐटनकुमार मल्ल।

सातै जनाको उम्मेदवारी दर्ता भएसँगै यसपटक मुगुमा बहुपक्षीय प्रतिस्पर्धा हुने देखिएको छ। ठूला दलसँगै नयाँ तथा वैकल्पिक दलहरूको सहभागिताले चुनावी प्रतिस्पर्धालाई थप रोचक बनाउने विश्लेषण गरिएको छ।

उम्मेदवारी दर्तापछि उम्मेदवारहरूले आ–आफ्ना प्रतिक्रिया दिँदै जनताको सेवामा समर्पित भएर काम गर्ने प्रतिबद्धता व्यक्त गरेका छन्। नेपाली कम्युनिस्ट पार्टीका उम्मेदवार चन्द्रबहादुर शाहीले किसान, मजदुर तथा पछाडि परेका वर्गको पक्षमा आवाज उठाउने बताएका छन्। नेपाली कांग्रेसका उम्मेदवार खडकबहादुर शाहीले मुगुको विकास, सडक, शिक्षा, स्वास्थ्य र रोजगारीलाई प्राथमिकतामा राख्ने जनाए।

त्यसैगरी, नेकपा एमालेका उम्मेदवार पूर्णबहादुर रोकायाले मुगुलाई समृद्ध जिल्लाका रूपमा विकास गर्ने लक्ष्यसहित आफू चुनावी मैदानमा उत्रिएको बताए। राष्ट्रिय स्वतन्त्र पार्टीका उम्मेदवार भुवन टमाटाले पुरानो राजनीतिक शैलीभन्दा फरक ढंगले काम गर्दै सुशासनलाई केन्द्रमा राख्ने प्रतिबद्धता जनाएका छन्।

विप्लव नेतृत्वको नेकपा माओवादीका उम्मेदवार संगम परियारले परिवर्तनका अधुरा एजेन्डा पूरा गर्न चुनावी प्रतिस्पर्धामा सहभागी भएको बताए। राप्रपाका उम्मेदवार बलबहादुर मल्लले धर्म, संस्कृति र राष्ट्रियताको संरक्षणलाई मुख्य एजेन्डा बनाउने जनाए भने प्रलोपा उम्मेदवार ऐटनकुमार मल्लले जनताको प्रत्यक्ष सहभागितामा आधारित राजनीति गर्ने दाबी गरे।

निर्वाचन तालिकाअनुसार अब प्रारम्भिक नामावली प्रकाशन, दाबी–विरोध, अन्तिम नामावली प्रकाशन तथा चुनाव चिह्न वितरणको प्रक्रिया अघि बढ्नेछ। त्यसपछि उम्मेदवारहरू औपचारिक रूपमा चुनावी प्रचारप्रसारमा जुट्नेछन्।

स्थानीय बासिन्दाहरूका अनुसार यसपटकको निर्वाचनले मुगुको विकासको दिशालाई नयाँ मोड दिन सक्ने अपेक्षा गरिएको छ। लामो समयदेखि सडक, सञ्चार, स्वास्थ्य र शिक्षामा समस्या झेल्दै आएका मुगुवासीले अब घोषणाभन्दा काम देख्न चाहेको प्रतिक्रिया दिएका छन्।

फागुन २१ गते हुने निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गर्न प्रशासन, सुरक्षा निकाय तथा निर्वाचन आयोगले तयारी तीव्र पारेको जनाइएको छ। उम्मेदवार र राजनीतिक दलहरूलाई निर्वाचन आचारसंहिता पालना गर्न निर्देशन दिइसकिएको छ। अबका दिनमा मुगु जिल्लामा चुनावी गतिविधि अझ तीव्र हुने निश्चित देखिएको छ।