जयपति ढकाल
सुर्खेतमा सञ्चालन भइरहेको प्रदेशस्तरीय स्थानीय कर्मचारी क्रिकेट कप–२०८२ को फाइनल खेलमा मुगु जिल्लाले पहिलो पटकको सहभागितामै उपाधि जित्दै इतिहास रचेको छ। फाइनल खेलमा मुगुले कालिकोटलाई ४२ रनले पराजित गर्दै च्याम्पियन बन्न सफल भएको हो।
उक्त प्रतियोगितामा प्रदेशभरका १२ वटा टिमको सहभागिता रहेको थियो। यो प्रतियोगिता मुगु जिल्लाको क्रिकेट इतिहासमै पहिलो औपचारिक सहभागिता पनि हो। हालसम्म जिल्लामा क्रिकेटसम्बन्धी ठूला गतिविधि नदेखिए पनि, यो सफलताले मुगु पनि प्रतिस्पर्धी क्रिकेट खेल्न सक्षम रहेको प्रमाणित गरेको छ।
टोलीका खेलाडी रवि धामीका अनुसार सीमित स्रोतसाधनका बाबजुद पनि टोलीको मेहनत, एकता र लगनशीलता नै यो ऐतिहासिक सफलताको प्रमुख आधार बनेको हो। उनले आगामी दिनमा मुगुमा क्रिकेटको पूर्वाधार विकास र नियमित प्रतियोगिता सञ्चालन गर्न सम्बन्धित निकायले ध्यान दिनुपर्ने आवश्यकता औंल्याए।
मुगुको यो ऐतिहासिक जितले जिल्लाको खेलकुद क्षेत्रमा नयाँ उत्साह, आत्मविश्वास र सम्भावनाको ढोका खोलेको छ। यसले स्थानीय स्तरका प्रतिभालाई प्रोत्साहन मिल्ने अपेक्षा गरिएको छ।
