बाँके-राप्ती सोनारी गाउँपालिकाका प्रमुख प्रशासकीय अधिकृत दानबहादुर ऐडीसँग ‘फेरि भेटौँला’ कार्यक्रम सम्पन्न गरिएको छ। संघीय मामिला तथा सामान्य प्रशासन मन्त्रालयको नियमित प्रशासनिक प्रक्रियाअनुसार प्रमुख प्रशासकीय अधिकृत ऐडीको इन्द्रावती गाउँपालिका, सिन्धुपाल्चोक सरुवा भएपछि गाउँपालिकाले सम्मानसहित ‘फेरि भेटौँला’ कार्यक्रम आयोजना गरेको हो।
कार्यक्रममा गाउँपालिकाकी कार्यवाहक अध्यक्ष मनिसा सिंह थारुले प्रमुख प्रशासकीय अधिकृत ऐडीलाई मायाको चिनो प्रदान गर्दै खादा लगाएर सम्मान गरिन्। उनले संघीयता कार्यान्वयनमा जनप्रतिनिधिसँगै कर्मचारीहरूको योगदान महत्वपूर्ण हुने उल्लेख गर्दै करिब २० महिनाको कार्यकालमा ऐडीले राप्ती सोनारी गाउँपालिकाको प्रशासनिक सुदृढीकरण तथा विकास प्रक्रियामा खेलेको भूमिका प्रशंसनीय रहेको बताइन्।
कार्यवाहक अध्यक्ष थारुले भनिन्,
“प्रमुख प्रशासकीय अधिकृत ऐडी अनुभवी र जिम्मेवार प्रशासक हुनुहुन्थ्यो। प्रशासनिक क्षेत्र मात्र नभई समग्र विकासप्रति उहाँको चासो, चिन्ता र प्रतिबद्धता अतुलनीय रह्यो। त्यसैले गाउँपालिकाले उहाँको योगदानलाई सधैं सम्मानका साथ सम्झिरहनेछ।”
कार्यक्रममा प्रमुख प्रशासकीय अधिकृत दानबहादुर ऐडीले आफू सरुवा भएर नयाँ जिम्मेवारीमा जाँदै गरे पनि राप्ती सोनारी गाउँपालिकाको विकास यात्रामा सधैं साथ रहने प्रतिबद्धता व्यक्त गरे। उनले कार्यकालभर प्राप्त सहयोग, सहकार्य र आत्मीयताप्रति जनप्रतिनिधि, कर्मचारी तथा सरोकारवालाप्रति धन्यवाद व्यक्त गर्दै आगामी दिनमा पनि निरन्तर सहकार्य हुने विश्वास व्यक्त गरे।
कार्यक्रममा गाउँपालिका लेखा अधिकृत गौरव लामिछानेले पनि प्रमुख प्रशासकीय अधिकृत ऐडीलाई मायाको चिनो प्रदान गर्दै नयाँ कार्यस्थलमा सफल कार्यकालको शुभकामना व्यक्त गरे।
‘फेरि भेटौँला’ कार्यक्रममा वडाअध्यक्षहरू, कार्यपालिका सदस्यहरू, पालिका कर्मचारी, राजनीतिक दलका प्रतिनिधि, शिक्षक तथा विभिन्न संघ–संस्थाका प्रतिनिधिहरूको उल्लेख्य उपस्थिति रहेको थियो।
