नेपालगंज, बाँके । आ.व. २०८२/८३ को वार्षिक स्वीकृत कार्यक्रम अनुसार खाद्य प्रविधि तथा गुण नियन्त्रण कार्यालय नेपालगंजले प्रथम त्रैमासिक प्रगति समीक्षा गोष्ठी कार्तिक १८ गते सम्पन्न गरेको हो ।
खाद्य प्रविधि तथा गुण नियन्त्रण कार्यालय, नेपालगंजका प्रमुख प्रशान्त पोखरेलको अध्यक्षतामा सम्पन्न कार्यक्रममा बाँकेका सहायक प्रमुख जिल्ला अधिकारी उमाकान्त अधिकारी प्रमुख अतिथिको रूपमा उपस्थित रहनु भएको थियो।
कार्यक्रम सञ्चालन खाद्य अनुसन्धान अधिकृत नेत्रा बोगटीले गर्नुभएको थियो भने स्वागत मन्तव्य प्राविधिक सहायक पूजा शर्माले गर्नुभएको थियो।
राष्ट्रगानबाट औपचारिक रूपमा उद्घाटन गरिएको गोष्ठीमा खाद्य प्रविधि तथा गुण नियन्त्रण डिभिजन कार्यालय दाङ र खाद्य प्रविधि तथा गुण नियन्त्रण कार्यालय नेपालगंजका तर्फबाट दुईवटा प्राविधिक तथा प्रगतिमूलक प्रस्तुति गरिएको थियो।
उक्त अवसरमा कार्यालयले आ.व. २०८२/८३ को पहिलो त्रैमासिक अवधिमा हासिल गरेका उपलब्धिहरू सार्वजनिक गरिएको थियो। सो अवधिमा कार्यालयले खाद्य उद्योग अनुगमन, नमुना संकलन, विषादी अवशेष परीक्षण, उपभोक्ता उजुरी समाधान लगायतका गतिविधिहरू प्रभावकारी रूपमा सञ्चालन गरेको जनाएको छ।
खाद्य ऐन २०२३ र खाद्य नियमावली २०२७ बमोजिम कार्यान्वयन गराउने प्रमुख निकायको रूपमा रहेको यस कार्यालयले खाद्य स्वच्छता तथा गुणस्तर कायम गर्न उद्योग र बजार अनुगमन, सचेतना कार्यक्रम, सूचना प्रसार र सरोकारवालासँगको समन्वयलाई प्राथमिकतामा राखेको जनाएको छ।
कार्यक्रमको समापनमा कार्यालय प्रमुख श्री पोखरेलले सहभागी सरोकारवालाहरूलाई धन्यवाद ज्ञापन गर्दै, “खाद्य सुरक्षाको सुनिश्चितता र उपभोक्ताको स्वास्थ्य संरक्षण हाम्रो साझा जिम्मेवारी हो,” भन्दै आगामी दिनहरूमा अझ प्रभावकारी ढंगले काम गर्न सबैको निरन्तर सहयोग र सहकार्य अपेक्षा व्यक्त गर्नुभयो।
कार्यक्रममा बाँकेका सहायक प्रमुख जिल्ला अधिकारी, घरेलु तथा साना उद्योग कार्यालयका प्रतिनिधि, नेपालगंज उपमहानगरपालिकाका अधिकारी, खाद्य उद्योगी, होटल, दुग्ध, मासु, पानी तथा किराना व्यवसायी संघका प्रतिनिधि, पत्रकारलगायत सरोकारवालाहरूको सक्रिय सहभागिता रहेको थियो।
