प्रकाश प्रसाद काफ्ले, कार्तिक १९। बालबालिकाको सिकाइ र समग्र शैक्षिक विकासमा अभिभावकको भूमिका महत्वपूर्ण रहेको बताउँदै रास्कोट नगरपालिका वडा नं. ४ र ५ मा अभिभावक शिक्षा कार्यक्रम सम्पन्न भएको छ।
प्लान इन्टरनेशनलको सहयोगमा मानव अधिकार तथा वातावरण विकास केन्द्र (हुरन्डेक) द्वारा आयोजित उक्त कार्यक्रम रास्कोट नगरपालिका, नगर युवा खेलकुद तथा शिक्षा शाखाको सहकार्यमा सम्पन्न गरिएको हो।
कार्यक्रममा अभिभावकहरूलाई घरमा सिकाइमैत्री वातावरण निर्माण, सकारात्मक अनुशासन, बालबालिकाको मनोवैज्ञानिक आवश्यकता र विद्यालयसँगको सहकार्यबारे जानकारी दिइएको थियो।
शसक्त बालिका परियोजनाका संयोजक तथा प्रशिक्षक पदम राज हमालले बालबालिकाको सफलताको आधार घर र विद्यालय दुवै भएको बताउँदै भने, “बालबालिकाको सफलता विद्यालय मात्र होइन, घरको माया, समय र समर्थनसँग पनि प्रत्यक्ष रूपमा सम्बन्धित हुन्छ।”
सहभागी अभिभावक सर्जन शाहीले कार्यक्रममा अनुभव आदान–प्रदान गर्दै भने, “यो कार्यक्रममा सहभागी भएपछि मैले मेरो बच्चाको पढाइमा म कसरी सहयोग गर्न सक्छु भन्ने स्पष्ट बुझाइ पाएँ। अब म विद्यालयसँग अझ नजिक भएर काम गर्नेछु।”
कार्यक्रममा वडा अध्यक्ष, विद्यालयका शिक्षक, विद्यालय व्यवस्थापन समितिका सदस्य तथा ७३ जना अभिभावकहरूको सहभागिता रहेको परियोजना संयोजक हमालले जानकारी दिनुभयो।
बिजयपुर आधारभूत विद्यालयका प्रध्यानाध्यापक यकिन्द शाहीले अभिभावक शिक्षाले विद्यालय र घरबीचको सम्बन्ध बलियो बनाउने र विद्यार्थीको सिकाइ उपलब्धिमा सकारात्मक प्रभाव पार्ने विश्वास व्यक्त गर्नुभयो।
कार्यक्रमको अन्त्यमा वडा नं. ५ का अध्यक्ष मन तिरूवाले अभिभावक शिक्षा कार्यक्रमले समुदायमा सचेतना बढाएको उल्लेख गर्दै आगामी दिनमा पनि यस्ता कार्यक्रम निरन्तर सञ्चालन गर्न वडाको तर्फबाट सहयोग गर्ने प्रतिबद्धता जनाउनुभयो।
