प्रकाश प्रसाद काफ्ले मुगु जिल्लाको सोरु गाउँपालिका–१ फुर्के सल्ला मोडमा सोमबार राति ट्र्याक्टर दुर्घटना हुँदा एक जनाको घटनास्थलमै मृत्यु भएको छ भने अर्को जना गम्भीर घाइते भएका छन्।
बाजुरा जिल्लाको गौमुल–३ निवासी २४ वर्षीय चालक सुरेश रोकायाको घटनास्थलमै मृत्यु भएको प्रहरीले जनाएको छ। सोरुकोटबाट गुल्म पिपलमुडा तर्फ विद्युत् पोल ढुवानीका लागि जाँदै गरेको लु ५ त १२३७ नम्बरको ट्र्याक्टर राति करिब ८ः३० बजे ब्रेक फेल भई करिब ७०० मिटर तल खसेको बताइएको छ।
दुर्घटनामा हुम्ला अदानचुली–२ का २८ वर्षीय रेशम भण्डारी गम्भीर घाइते भएका छन्। उनको जिल्ला अस्पताल मुगुमा उपचार भइरहेको जिल्ला प्रहरी कार्यालय मुगुले जनाएको छ।
प्रहरीका अनुसार दुर्घटनाको थप अनुसन्धान भइरहेको छ।
