बाँके – भदौं २४ गतेको आगलागी, तोडफोड र लुटपाटका कारण करिब एक महिनादेखि प्रभावित बाँके जिल्ला अदालतको सम्पूर्ण सेवा कार्तिक १७ गतेदेखि पुनः सञ्चालनमा आएको छ।
अदालत परिसरमा भएको आगलागीका कारण भवन, फाइल र उपकरणमा क्षति पुगेपछि अदालतको नियमित सेवा अस्थायी रूपमा स्थगित गरिएको थियो। सो घटनापछि आवश्यक मर्मत, कागजात मिलान, अभिलेख व्यवस्थापन तथा सरसफाइ कार्य सम्पन्न गरी अहिले अदालत परिसरमै टेन्ट टाँगेर अस्थायी रूपमा सेवा सुचारु गरिएको छ।
अदालतका प्रशासन शाखा प्रमुख श्री तिर्थराज आचार्य का अनुसार —
“न्यायिक सेवा अवरुद्ध हुन नदिन अदालत परिवार, सुरक्षाकर्मी, स्थानीय निकाय र सरोकारवालाको सहकार्यमा अस्थायी टेन्टबाटै पूर्ण सेवा सुरु गरिएको हो। सेवा निरन्तरता नै हाम्रो पहिलो प्राथमिकता हो।”
हाल अदालतमा मुद्दा दर्ता, फैसला कार्यान्वयन, प्रतिलिपि, बयान, आदेश, प्रमाणपत्र लगायतका नियमित सेवा पुनः सुरु भएका छन्।
त्यस्तै भदौ २५ गतेदेखि स्थगित मुद्दाहरूलाई क्रमबद्ध रूपमा पेशी तालिकामा समावेश गर्ने कार्य पनि सुरु गर्न लागिएको छ।
सेवा पुनः सञ्चालनपछि लामो समयदेखि प्रतीक्षारत वादी–विवादी, कानून व्यवसायी तथा सरोकारवालाहरूलाई सहजता पुगेको छ। अदालतले परिस्थितिअनुसार टेन्टबाट सेवा प्रवाह गर्दै अदालत भवन पुनःनिर्माणका कामलाई तीव्रता दिने जनाएको छ।
