नेपालगञ्ज, – मध्यपश्चिमाञ्चल पेट्रोलियम ढुवानी व्यवसायी संघको सातौँ साधारण सभा शनिबार भव्यतापूर्वक सम्पन्न भएको छ। संघका अध्यक्ष अमरजीत सिंहको अध्यक्षतामा भएको सभामा संघको विगत वर्षको गतिविधि, पेट्रोलियम ढुवानी क्षेत्रका चुनौती र समाधानका उपायबारे व्यापक छलफल गरिएको थियो।
सभामा नेपाल पेट्रोलियम राष्ट्रिय डीलर्स एसोसिएसनका प्रमुख अतिथि सरोज प्रसाद पाण्डे, नेपाल आयल निगम इन्धन डिपोका प्रमुख मनोहर डी.सी., र नेपाल आयल निगम हवाई इन्धन प्रमुख मोहन बिक्रम खड्का विशेष अतिथि रहेका थिए।
संघका सचिव टी.पी. न्यौपानेले सञ्चालन गरेका कार्यक्रममार्फत संघले आफ्नो विगत वर्षको प्रतिवेदन प्रस्तुत गर्दै आगामी वर्षका लागि स्पष्ट कार्ययोजना पनि सार्वजनिक गरेका थिए। सदस्यहरूले पेट्रोलियम ढुवानी व्यवसायमा देखिएका चुनौती, ढुवानीका क्रममा आउने समस्याहरू र सुरक्षित तथा व्यवस्थित सेवा प्रवाहका उपायबारे आफ्ना विचार राखेका थिए।
प्रमुख अतिथि पाण्डेले व्यवसायीहरूले भोगिरहेका चुनौतीको समाधानका लागि सरकार र सम्बन्धित निकायसँग सहकार्य गरेर अघि बढ्नुपर्नेमा जोड दिए। त्यस्तै, अतिथि मनोहर डी.सी. र मोहन बिक्रम खड्काले ढुवानी व्यवसायमा पारदर्शिता, समयमै इन्धन आपूर्ति, र व्यवसायीबीच आपसी एकताले मात्र क्षेत्रलाई सुदृढ बनाउन सकिनेमा बल दिएका थिए।
अध्यक्ष अमरजीत सिंहले सभामा उपस्थित सबै अतिथि, सदस्य र सरोकारवालालाई धन्यवाद दिँदै पेट्रोलियम ढुवानी व्यवसायलाई अझ प्रभावकारी, सुरक्षित र व्यवसायीमैत्री बनाउन संघ निरन्तर सक्रिय रहने प्रतिबद्धता व्यक्त गरे।
साधारण सभा नेपालगञ्जस्थित होटल सिद्धार्थमा सम्पन्न भएको थियो।
