मुगु — सोरु गाउँपालिका–३, भीई गाउँमा अवस्थित ऐतिहासिक गुरादेव मन्दिरको भव्य उद्घाटन गरिएको छ।
उद्घाटन समारोहमा प्रमुख अतिथि नेपाल सरकारका वन तथा वातावरण मन्त्री ऐनबहादुर शाहि, विशेष अतिथि कर्णाली प्रदेशका भौतिक पूर्वाधार मन्त्री माननीय मंगल बहादुर शाहि, संविधानसभा सदस्य नवराज धामी, सोरु गाउँपालिका अध्यक्ष धर्मबहादुर शाहि र खत्याड गाउँपालिका अध्यक्ष अजबहादुर शाहि लगायतको सहभागिता रहेको थियो।
मन्दिर निर्माणमा करिब १ करोड ४० लाख रुपैयाँको लागत लागेको छ, जसको बजेट संघीय सरकारबाट प्राप्त भएको हो। यसलाई सोरु गाउँपालिकाको नमुना मन्दिरको रुपमा विकास गरिएको र प्रदेश सरकारको विशेष पहल रहेको उद्घाटन कार्यक्रममा जानकारी दिइयो।
उद्घाटन कार्यक्रमलाई सम्बोधन गर्दै प्रदेशका भौतिक पूर्वाधार मन्त्री माननीय मंगल बहादुर शाहि ले धार्मिक पर्यटकिय दृष्टिकोणले मन्दिर महत्त्वपूर्ण हुने उल्लेख गर्दै प्रदेश सरकार धार्मिक तथा सांस्कृतिक स्थलको संरक्षणमा निरन्तर सहयोग गर्ने बताए।
यसैगरी, यसै वर्ष सोरु गाउँपालिका–३ मा प्रदेश सरकारको पहलमा १२० किलोवाट क्षमताको मिनिग्रिड सोलार प्रणाली पनि उपलब्ध भएको छ। यसले बस्तीमा दिगो ऊर्जा आपूर्ति गर्दै गाउँलाई उज्यालो बनाउने अपेक्षा गरिएको छ।
स्थानीयवासीले गुरादेव मन्दिरको उद्घाटन र सौर्य ऊर्जा प्रणालीको व्यवस्थाले धार्मिक, सांस्कृतिक र विकासका दृष्टिले गाउँलाई नयाँ उचाइमा पुर्याउने विश्वास व्यक्त गरेका छन्।
