नेपालगञ्ज – बाँके जिल्ला अदालतले नेपालगञ्ज उपमहानगरपालिका–११ स्थित बिसमिल्ला होटल का सञ्चालक मोहम्मद उमर साईलाई ६ महिना कैद र १ लाख रुपैयाँ जरिवाना सजाय सुनाएको छ।
खाद्य प्रविधि तथा गुण नियन्त्रण कार्यालय, नेपालगञ्ज, बाँकेले दायर गरेको मुद्दामा अदालतले सजाय तोकेको हो। कार्यालयले गत वर्ष २०८१ जेठ ५ गते मुद्दा दायर गरेको थियो।
अनुगमन टोलीले सो होटलमा गरेको स्थलगत निरीक्षणका क्रममा विर्यानी पकाउने ठाउँ खुला रहेको, शौचालयसँग जोडिएको, अत्यधिक फोहोर अवस्थामा रहेको, झिंगा भन्केको, फ्रिजमा दूषित अवस्थामा मासु भण्डारण गरेको, Non-food grade प्लास्टिकका भाँडामा प्याज, रायता, ब्रेडक्रम र चिकन जस्ता खाद्य सामग्री भण्डारण गरेको तथ्य फेला पारेको थियो। साथै, पकाएर खाने खाना बिर्यानी र कवाफ मा Synthetic food color प्रयोग गरिएको, भण्डारण कक्ष अत्यन्त फोहर भएको, खानेकुरा अव्यवस्थित राखिएको, कच्चा पदार्थ भण्डारण गर्ने स्थानमै फोहोर फाल्ने तथा थुक्ने कार्य भइरहेको प्रमाणित भएको थियो।
यी प्रमाणका आधारमा अदालतले होटल सञ्चालक उमर साईलाई खाद्य स्वच्छता तथा गुणस्तर ऐन, २०८१ विपरीत कार्य गरेको ठहर गर्दै सजाय सुनाएको हो।
यससँगै खाद्य प्रविधि तथा गुण नियन्त्रण कार्यालय, नेपालगञ्जले अघिल्लो आर्थिक वर्षमा मात्रै कुल ६ वटा मुद्दा दायर गरेको जनाएको छ। तीमध्ये यो मुद्दामा अदालतले ठोस फैसला सुनाएपछि अन्य मुद्दामा समेत कडाइ हुने अपेक्षा गरिएको छ।
स्थानीय प्रशासनले यस फैसलालाई खाद्य व्यवसायमा संलग्न सबै होटल तथा रेष्टुरेन्ट सञ्चालकका लागि चेतावनीको घण्टी भएको टिप्पणी गरेको छ।
