विनोद शाही -मुगु
सोरु गाउँपालिका वडा नं. ३ अन्तर्गत दलित बस्तीका ७० घरधुरीलाई १/१ सेट ग्यास चुलो वितरण गरिएको छ। कार्यक्रम आर्थिक वर्ष २०८१/८२ को सोरु गाउँपालिकाको स्वीकृत वार्षिक योजना अनुसार सम्पन्न गरिएको हो।
स्थानीय वासिन्दाहरू लामो समयदेखि दाउरा सङ्कलनको झन्झट र धुवाँका कारण स्वास्थ्यमा परेको असरबाट पीडित रहँदै आएका थिए। यस्तो पृष्ठभूमिमा धुवाँरहित ग्यास चुलो वितरण गरिएपछि स्वास्थ्यमा सुधार र वातावरण संरक्षणमा टेवा पुग्ने अपेक्षा गरिएको छ।
कार्यक्रमको अगुवाइ नेकपा माओवादी केन्द्रबाट मनोनीत गाउँपालिका कार्यपालिका सदस्य श्री हरिलाल दमाई (नेपालीले) गर्नुभएको हो। उहाँका अनुसार परम्परागत दाउरा चुल्होले महिलाको स्वास्थ्यमा प्रतिकूल असर पार्ने र वातावरणमा समेत नकारात्मक प्रभाव पार्ने भएकाले ग्यास चुलो वितरणको प्रस्ताव कार्यपालिकामा प्रस्तुत गरिएको थियो।
उक्त प्रस्तावलाई गाउँपालिकाका अध्यक्ष धर्म बहादुर शाही उपाध्यक्ष केशर बहादुर शाही तथा सम्पूर्ण कार्यपालिका टिमले स्वागत गर्दै “एक घर, एक ग्यास चुलो” गाउँपालिका को नीति तथा कार्यक्रम अन्तर्गत वडा नं. ३ मा पाइलट कार्यक्रमको रूपमा स्वीकृति दिएको गाउँपालिका स्रोतले जानकारी दिएको छ।
का पा सदस्य श्री हरिलाल दमाई( नेपालीका) अनुसार, “ग्यास चुलो वितरण मात्र नभई गृहिणी महिलालाई सुरक्षित प्रयोग र सचेतना सम्बन्धी तालिम पनि प्रदान गरिनेछ।”
उहाँले आफ्नो कार्यकालमा वडा नं. ३ का सबै बस्तीमा ग्यास चुलो पुर्याउने लक्ष्य रहेको बताउँदै, सफल कार्यान्वयनपछि उक्त कार्यक्रमलाई सम्पूर्ण गाउँपालिकामा विस्तार गरिने योजना रहेको उल्लेख गर्नुभयो।
गाउँपालिका स्रोतका अनुसार, सोरु गाउँपालिकाको आवधिक योजनामा समेत महिला लक्षित कार्यक्रम अन्तर्गत ‘एक घर, एक चुल्हो’ अभियानलाई प्राथमिकता दिइएको छ।
