बाँके-खाद्य प्रविधि तथा गुण नियन्त्रण कार्यालय, नेपालगञ्जको आयोजनामा आज एक विशेष समारोहबीच माइक्रोबायोलोजी प्रयोगशालाको औपचारिक उद्घाटन तथा आर्थिक वर्ष २०८१/८२ को वार्षिक समिक्षा गोष्ठी सम्पन्न भएको छ।

कार्यक्रममा खाद्य प्रविधि तथा गुण नियन्त्रण विभागका महानिर्देशक संजिव कुमार कर्ण प्रमुख अतिथिका रूपमा सहभागी हुनुभएको थियो भने कार्यालय प्रमुख प्रसान्त पोखरेलको अध्यक्षतामा कार्यक्रम सम्पन्न भएको हो।

कार्यक्रममा विभागका विभिन्न शाखाका वरिष्ठ अधिकृतहरू, FHI 360 Nepal, The Fleming Fund, UKaid का प्रतिनिधिहरू, प्राविधिक विज्ञहरू, स्थानीय सरोकारवाला निकाय तथा सञ्चारकर्मीहरूको उल्लेखनीय सहभागिता रहेको थियो।

खाद्य परीक्षणमा ऐतिहासिक उपलब्धि

हालै निर्माण सम्पन्न माइक्रोबायोलोजी प्रयोगशालाको उद्घाटनसँगै नेपालगञ्ज क्षेत्रमा AMR (Antimicrobial Resistance) निगरानी प्रणाली र खाद्य सुरक्षा परीक्षण कार्य थप सुदृढ हुने विश्वास लिइएको छ।

प्रयोगशालाको स्थापना खाद्य प्रविधि तथा गुण नियन्त्रण विभाग, बबरमहलको पहलमा, FHI 360 Nepal तथा UKaid द्वारा सञ्चालित The Fleming Fund Country Grants कार्यक्रमको सहकार्यमा सम्पन्न भएको हो।

प्रशिक्षण समापन र प्रमाणपत्र वितरण

कार्यक्रमकै अवसरमा हालै सम्पन्न “Microbiology Laboratory Placement Training on AMR Surveillance” तालिम सफलतापूर्वक सम्पन्न गर्ने प्राविधिकहरुलाई प्रमाणपत्र वितरण गरिएको थियो।

तालिम २०८२ साउन १४ देखि १९गतेसम्म सञ्चालित भएको थियो।

वार्षिक समिक्षा गोष्ठी – उपलब्धि र आगामी कार्ययोजना

वार्षिक समिक्षा गोष्ठीमा कार्यालय प्रमुख प्रशान्त पोखरेलले आर्थिक वर्ष ०८१/८२ को कार्यसम्पादन विवरण प्रस्तुत गर्नुभयो।

उहाँका अनुसार:

• वित्तीय प्रगति ५२% र भारित प्रगति ५८% रहेको छ।

• कार्यलय भवनको कौसीमा पक्की कोठा निर्माणार्थ आएको रु. १ करोडको बजेट फिर्ता हुँदा समग्र प्रगति प्रभावित भएको हो।

• सो बाहेकको प्रगतिमा वित्तीय प्रगति ९२% र भारित प्रगति ९५% रहेको छ।

• बेरुजु शून्य रहेको र कार्यालयले रु. २५,५३,४८३।– राजस्व संकलन गरेको छ।

नमूना संकलन, परीक्षण र उद्योग निगरानी

• आ.व. ०८१/८२ मा ६९५ वटा खाद्य वस्तु/नमूना संकलन गरियो।

• १०६ ऐन/नियम वमोजिम, २१३ Surveillance, ३७६ RBPR विधिबाट।

• २२६ मध्ये १६ (७%) नमूना प्रयोगशालामा प्रतिकूल।

• २९७५ परीक्षणमध्ये ३५८ (१२%) प्रतिकूल पाइयो।

• ६९ उद्योगलाई नयाँ अनुज्ञापत्र, २६२ नविकरण, ८९ नयाँ उद्योग सिफारिस।

• २८७ पटक अनुगमन:

• खाद्य उद्योग: ११५

• दाना उद्योग: ६

• खाद्य बजार: ६१

• दाना बजार: १३

• होटल/रेस्टुरेन्ट: ५३

• संवेदनशील उद्योग (दूध, तेल, पानी): ३०

• अनुगमनमा भेटिएका अयोग्य खाद्य वस्तुहरू रु. २,२५,७२०।– बराबरको जफत तथा नष्ट।

वक्तव्यहरू:

प्रमुख अतिथि संजिव कुमार कर्णले उद्घाटन समारोहमा भन्नुभयो:

“नेपालगञ्जस्थित माइक्रोबायोलोजी प्रयोगशाला विभागीय स्तरमै अत्याधुनिक प्रविधियुक्त प्रयोगशाला हो। यसले खाद्य सुरक्षाका लागि नयाँ गन्तव्य तय गर्नेछ।”

कार्यक्रम अध्यक्ष प्रसान्त पोखरेलले भन्नुभयो:

“नव–स्थापित प्रयोगशालाबाट अब स्थानीय तहदेखि केन्द्रसम्मका खाद्य नमूनाको वैज्ञानिक परीक्षण, निगरानी, तथा गुणस्तर सुनिश्चितता थप प्रभावकारी हुनेछ। विज्ञान र सेवा समन्वय गर्दै अगाडि बढ्नेछौं।”