नेपालगंज – खाद्य प्रविधि तथा गुण नियन्त्रण कार्यालय, नेपालगंज, बाँकेले आज मंसिर ११ गते कार्यालयको सभाहलमा आ.व. २०८०/८१ को “पहिलो त्रैमासिक समिक्षा गोष्ठी” सम्पन्न गरेको छ।
यस कार्यालयले यस ३ महिनाको अवधिमा १०१ पटक विभिन्न प्रकारका खाद्य व्यवसाय अनुगमन गरेको र उपभोग्य मिति सकिएको, लेवल विवरण नभएको तथा अन्य कैफियत देखिएका खाद्य वस्तुहरु लगभग रु. ७०,२७० बराबरको जफत नष्ट गरेको छ।
यस कार्यालय अन्तर्गत प्रयोगशालामा ८०५ वटा खाद्य तथा दाना नमुनाहरु विश्लेषण भएकोमा ४२ वटा नमुनाहरुमा कैफियत देखिएको थियो।
उक्त कार्यक्रममा खाद्य प्रविधि तथा गुण नियन्त्रण कार्यालय नेपालगंजको वार्षिक प्रगति प्रतिवेदन खाद्य अनुसन्धान अधिकृत रामहरी लामिछानेले प्रस्तुत गर्दै कार्यालयको वित्तीय प्रगति ३६.६१ प्रतिशत, भारित प्रगति ५२.८८ प्रतिशत र राजश्व संकलन रु. ९,०९,११० रहेको जानकारी गराउनुभयो। उहाँले प्रगति कम हुनुको कारण भाद्र अन्तिममा मात्र बजेट प्राप्त भएको र दरबन्दी अनुसार कर्मचारी नभएको बताउनुभयो।
यसै गरि खाद्य प्रविधि तथा गुण नियन्त्रण डिभिजन कार्यालय, दाङको प्रगति प्रतिवेदन प्रस्तुत गर्दै कार्यालय प्रमुख उज्जल रायमाझीले लक्ष्य अनुसार प्रगति भएको बताउनुभयो। यस आवधिमा कार्यालयले ६६ पटक व्यवसाय अनुगमन गरेको थियो।
कार्यक्रममा उपभोक्ता हित संरक्षण मंचका सचिव प्रभात कुमार ठकुरीले यस कार्यालयले खाद्य स्वच्छताको क्षेत्रमा राम्रो काम गरेको भए पनि बजारमा अस्वच्छ तथा कम गुणस्तरका सामानको विगविगी रहेको पाइएकोले आगामी दिनमा कार्यालयले अझै प्रभावकारी रुपमा काम गर्नु पर्नेमा जोड दिनुभयो।
यसै गरि उपभोक्ता मंच नेपाल, बाँकेका अध्यक्ष सुदिप भट्टराईले अनुगमनलाई थप प्रभावकारी बनाउनुपर्ने बताउनुभयो।
नेपाल पत्रकार महासंघका सचिव कमल डाँगीले सरकारी कार्यालय र पत्रकार बिचको अन्तरक्रियाले जनतामा सहि समाचार सम्प्रेषण हुने भएकोले यस्ता कार्यक्रम महत्वपूर्ण रहेको बताउनुभयो।
नेपालगंज उद्योग बाणिज्य संघका प्रथम उपाध्यक्ष चिरन्जीवी ओलीले उपभोक्ताले गुणस्तरिय बस्तु प्राप्त गर्नुपर्नेमा आफुहरु संधै सजग रहेको र नियमनकारी निकायले गर्ने अनुगमनमा सहजीकरण गर्ने बताउनुभयो।
कार्यक्रमका प्रमुख अतिथि जिल्ला प्रशासन कार्यालय, बाँकेका सहायक प्रमुख जिल्ला आधिकारी लालबहादुर गुरुङले कार्यक्रम सफलताको शुभकामना दिनुहुदै यस कार्यालयको जिम्मेवारी गहन रहेकोले यस कार्यालयले गरेका काम अझ प्रभावकारी रुपमा जनतामाझ पुर्याउनुपर्ने बताउनुभयो।
कार्यक्रमको अन्त्यमा कार्यालयका निमित्त कार्यालय प्रमुख अमित भूषण सुमनले कार्यालयले यस क्षेत्रको खाद्य स्वच्छता कायम गर्न नियमित काम गरिरहेको बताउनुभयो। खाद्य स्वच्छता एउटा निकायको प्रयासले मात्र सम्भव नहुने हुँदा सबै सरोकारवालालाई साथ सहयोगको लागि आवान गर्नुभयो।
कार्यक्रममा विभिन्न सरकारी निकायका कार्यालय प्रमुख/प्रतिनिधि, उद्योग बाणिज्य संघका प्रतिनिधि, उपभोक्ता कर्मी, विभिन्न संघ/संस्थाका प्रतिनिधि, पत्रकार लगायतको सहभागिता थियो। खाद्य अनुसन्धान अधिकृत एकराज बुढाथोकीले संचालन गरेको कार्यक्रममा खाद्य अनुसन्धान अधिकृत अन्जु हुमागाँईले स्वागत मन्तव्य राख्नु भएको थियो।
