बाँके  –सरकारले चालु आर्थिक बर्षबाट खारेज गर्ने प्रस्ताव गरेको कपास विकास समितिका बारेमा पूर्वप्रधानमन्त्री एवं नेपाली काँग्रेसका सभापति शेरबहादुर देउवाको ध्यानार्कषण गराइएको छ । समितिका अध्यक्ष हेमन्तराज काफ्ले नेतृत्वको टोलीले आईतवार काठमाडौंमा देउवालाई ज्ञापनपत्र बुझाउँदै कपास विकास समितिबारे ध्यानार्कषण गराएको हो ।

अध्यक्ष काफ्लेका अनुसार,समिति संचालनका बारेमा देउवा सकारात्मक रहेका छन् । देउवाले सरकारका उपप्रधानमन्त्री पूर्णबहादुर खड्कालाई कपास विकास समिति संचालनका बारेमा निर्देशन दिएकाले कपास विकास समिति खारेज नहुने आशा पलाएको काफ्लेले बताए ।

गत जेठमा आ.व. २०८०÷८१ का लागि बजेट ल्याउँदा सरकारले कपास विकास समिति खारेज गर्ने निर्णय गरेको थियो ।
बाँके, बर्दिया र दाङ जिल्लामा कपास कृषकहरूबाट कपास उत्पादन गराई चालु आ.व.मा १० हजार प्रति कुईन्टल खरिदको मूल्य पूर्व निर्धारण गरी १ सय ५० बिगाहाको लागि बीउ, विषादी कृषकहरू माझ गइसकेको छ ।
हेटौँडा कपडा उद्योग र बुटवल धागो कारखानालाई कच्चामाल उपलब्ध गराउने उद्देश्यले स्थापना भएको समितिले बजारको खोजी गरी विराटनगर, काठमाडौँ, बुटवलका सेनेटरी प्याड बनाउने उद्योगलाई कपास बिक्री गर्दै आएको छ । समितिसँग अर्वौ रुपियाँको जमिन, करोडौँको आधुनिक कपास प्रशोधन गर्ने मेसिन छन्  ।
२०५९ सालसम्म उथलपुल भएरै संचालन भए पनि बीचका केही वर्ष बन्द भएर २०६३ साल देखि पुनः संचालनमा आएको समिति कठिनाई अवस्थामा भने छ । समितिको बाँकेमा १० विगाहा, दाङको टरिगाउँमा ३ विगाहा, बर्दियाको तारातालमा ३ बिगाहा, कुम्बरमा ५ सय ५० हेक्टर जमिनका साथै भौतिक संरचना छ । बर्दियाको कुम्बरमा रहेको कपास विकास समितिको जग्गा अतिक्रमणमा छ ।