नेपालगन्ज –नेपालगन्ज उपमहानगरपालिकाभित्र पछिल्लो चार वर्षमा
आगलागीका दुई ८३ वटा घटना भए । जसमा करोडौंको क्षती भएको प्रहरीले
मुचुल्का उठाएको छ । यि आगलागीका घटनाको मुख्य कारण विद्युत सर्टलाई
मानिएको छ । आगलागी घटनाको ४०% कारण विद्युत सर्ट देखिएको बारुणयन्त्र
शाखा ईन्चार्ज झैनबहादुर खड्का
बताउँछन् ।

बारुणयन्त्र शाखाका अनुसार,२०७६ मा ७४,२०७७ मा ६८, २०७८ मा ६१ र २०७९ मा ८०
वटा आगलागीका घटना भएका थिए । ती मध्ये १ सय १२ वटा आगलागीको मुख्य
कारण विद्युत सर्ट हो भने अन्य कारण ग्याँस बिस्फोट लगायतलाई मानिएको छ
। ‘पुराना घरमा कम क्षमताका बिद्युतीय सामाग्री प्रयोग भएको र त्यसमा बढि
बिद्युत खपत गर्ने सामानको प्रयोग हुँदा आगलागी भएको देखिन्छ ।’
बारुणयन्त्रका कर्मचारी भन्छन्,–
‘भार थेग्न नसकेपछि विद्युत सर्ट भएर आगो लागेको हामीले भेटेका छौं ।’

आगलागीको मुख्य कारण बनेको विद्युत सर्ट सम्बन्धी समस्या बढ्दै गएपनि त्यसका
कारणको खोजि गरेर समाधान निकाल्न सरोकारवाला निकायले चासो दिएका
छैनन् । विद्युत सर्ट भवितव्य मात्र नभई गुणस्तरहिन सामाग्रीको प्रयोगका कारण
भइरहेको हुँदा त्यसको नियमन गर्नुपर्ने उपभोक्ताहित संरक्षण मन्चका बाँकेका
सचिव प्रभातसिंह ठकुरी बताउँछन् । उनी भन्छन्,–‘विद्युत सर्टको कारण
खोज्नुपर्छ अनि मात्र यस्ता घटना कम गर्न सकिन्छ ।’ उपभोक्ता सचेत हुने मात्र
नभई बजारमा बेचबिखन भइरहेका इलेक्ट्रिक सामाग्रीको अनुगमन समेत हुनुपर्ने
ठकुरी बताउँछन् ।

नेपालगन्ज उपमहानगरपालिकाका प्रमुख प्रशासकिय अधिकृत शिवप्रसाद रिजालले विद्युत
सर्टका कारण उत्पन्न हुने समस्या समाधानका लागि सरोकारवाला व्यवसायीलाई
प्रशिक्षण दिने काम भएको बताउँछन् । उनी भन्छन्,–‘व्यवसायी साथीहरुलाई
बोलाएर इलेक्ट्रीक सामाग्रीको विक्री वितरणमा सम्झौता नगर्न र प्रयोगको
बिधिका बारेमा जानकारी गराएका छौं ।’

गुणस्तरहिन सामाग्रीको प्रयोग गर्नाले विद्युत सर्टको समस्या देखिने गरेकोमा
स्वंय व्यवसायी समेत सहमत छन् । तर त्यसमा व्यवसायी मात्र नभई उत्पादकदेखि
उपभोक्तासम्म दोषी देखिन्छन् । नेपालगन्ज इलेक्ट्रिक एशोसिएसनका सचिव
सुरेन्द्र कुवंर भन्छन्,–‘विद्युत भनेको अत्यन्त संवेदनशिल कुरा हो । यसमा
प्रयोग हुने सामाग्रीको उत्पादन र वितरणमा सम्झौता गर्नु भएन । साथै
उपभोक्ताले पनि कम क्षमताको विद्युतीय सामाग्री जडान गरेर धेरै पावर खिच्ने
सामाग्रीको प्रयोग गर्नुभएन ।’