नेपालगन्ज – नेपालगञ्जको रानी तलाउ नजिकै कोरियनपुरका चुन्ना खाँ टमाटर बिक्रिका लागि ठेलाको एक छेउमा उभिएर ग्राहकको पखाईमा बस्छन् । प्रत्येक बिहान सोही ठाउँमा ग्राहक पर्खि रहने चुन्नाले टमाटरको भाउ सस्तो हुँदा दैनिक सय देखि डेढसय किलोसम्म टमाटर बिक्रि गर्ने गर्थे।

टमाटरको भाउ महंगीएपछि हिजोआज पचास किलो मात्रै टमाटर बिक्रि गर्नलाई खरिद गर्ने गरेको चुन्ना बताउछन् ।
उनका अनुसार टमारटको भाउले आकाश छोएपछि मुस्किलले दैनिक प्रन्ध्र बीस किलो टमाटर बिक्रि हुने गर्दछ । ‘पहिला पहिला मैले यही ठेलामा सयदेखि पचास साठी किलोसम्म टमाटर बिक्रि गर्ने गर्थें । तर अहिले टमाटरको भाउ महंगिएपछि दिनको बीस किलो बिक्रि गर्न पनि गाह्रो छ ।’ चुन्नाले भन्नुभयो,‘तरकारी किन्न आउने ग्राहकले किलोका किलो अरु तरकारी किनेर लैजान्छन् तर टमाटर किन्दा जम्मा एक पाउ या त आधा किलो तौलि दिनुस् न भन्छन् ।’

रानी तलाउ नजिकै रहेको तरकारी बजारबाट थोकमा किलोको एक सय बीस रुपैंयाका दरले दैनिक पचासदेखि साठी किलोसम्म टमाटर खरिद गरेर चुन्नाले फुटकरमा एक सय चालिसमा बिक्रि गर्ने गर्छन।

पहिला पहिला बिहे भोजमा र होटेल रेस्टुरेन्टमा एकै पटक पन्ध्र बीस किलो टमाटर किन्नेहरुले हिजोआज बजारमा टमाटर महंगीएपछि मुस्किलले एक डेढ किलो टमाटर किन्ने गरेको चुन्नाले बताए ।
टमाटरको भाउ महंगीएपछि चुन्ना जस्तै बिक्रिका लागि टमारट खरिदको मात्रा घटाएकी छन् शितल केसीले पनि ।

बर्दियाकी शितलले विगत ४ वर्षदेखि सोही स्थानमा ठेलामा तरकारी व्यापार गर्दै आएकी उनले पनि टमाटरको भाउ बजारमा एक सय चालिस देखि एक सय साठी हुँदा खरिदको मात्रा घटाएर अहिले जम्मा दश बाह्र किलो बिक्रिका लागि राखेकि छन्। ‘अरु तरकारी किन्दा टमाटर पनि बिक्रि भई हाल्छ कि भन्ने आशामा थोरै भएपनि टमाटर राख्ने गर्दछु ।’ उनले भनिन,‘बिक्रि भई हाल्यो भने त टमाटरबाट हिजोआज फाईदा त हुन्छ ।

तर सित्तिमित्ति बिक्रि गर्न गाह्रो छ ।’
टमाटरबाट यति नै नाफा भएको भनेर आफुले हिसाब नगरेको शितलको भनाई छ । ‘महंगीले गर्दा पहिला जस्तो अब टमाटर बिक्रि हुँदैन । मैले पहिला दिनमा चालिस पैतालिस किलो टमाटर बिक्रि गर्ने गर्थें । तर अहिले दश बाह्र किलो खरिद गर्दा बिक्रि जम्मा चार पाँच किलो मात्र हुन्छ ।’ उहाँले भन्नुभयो,‘बाँकी बचेको टमाटर भोलीसम्म बिग्रन्छ कि भन्ने डर उस्तै हुन्छ अनि बिग्रिएन भने कसरी बेच्ने भन्ने चिन्ता त छँदै छ ।’ शितलको आय श्रोत भनेकै ठेलामा राखिएको तरकारी बिक्रिबाट हुने कमाई हो ।

भारतबाट टमाटरको आयात रोकिएपछि नेपालगञ्जको तरकारी बजारमा रोल्पा, सल्यान, सुर्खेत लगाएत पाहाडि जिल्लाबाट टमाटर आउने तरकारी बजार संचालक समितिका अध्यक्ष मोतीसरा थापाले बताइन । उनका अनुसार भारतीय बजारमा पनि नेपाली टमाटर निर्यात हुने हुँदा तरकारी बजार नेपालगञ्जमा दुई तीन दिनको फरकमा टरमाटर आईपुग्छ ।

अध्यक्ष थापाले पाहाडी जिल्लाबाट करिब ढाई देखि तीन सय किलोको हाराहारीमा टमाटर नेपालगञ्जको तरकारी बजारले खरिद गर्ने बताइन । तरकारी बजारबाट टमाटर थोकमा किलोको एक सय चालिस रुपैंयाका दरले बिक्रि हुने अध्यक्ष थापाले जानकारी दिइन ।