बाँके । शान्ति पुनर्स्थापना गृह नेपालगंज, बाँकेले जिल्लाका विभिन्न नाकाबाट आ.व.२०७९/८० मा मानव बेचबिखन तथा ओसारपसारको जोखिमा रहेका २८८ जना महिला, किशोरी तथा बालबालिकाहरुको उद्धार गरेको छ ।
उद्धार गरिएको मध्ये सबैभन्दा बढी जमुनाहा नाकाबाट २३३ जनाको उद्धार गरिएको छ । त्यस्तै जानकीको शिवपुरी नाकाबाट २२, डडुवाको खडैचा नाकाबाट १२, नरैनापुरको सुइया/बगौडा नाकाबाट ४ जना र कोहलपुर बसपार्क स्थित रहेको सूचना तथा परामर्श केन्द्रबाट १७ जनाको उद्धार गरिएको शान्ति पुनर्स्थापना गृहका क्षेत्रीय कार्यक्रम संयोजक निर्मल सुवेदीले जानकारी दिए । मानव बेचबिखन तथा ओसारपसारको जोखिमपुर्ण यात्रामा रहि उद्धार गरिएका मध्ये बाँकेका ५८, बर्दियाका ४२, सुर्खेतका २८, जाँजरकोटका २०, दैलेखका १८, दाङका १७, सल्यानका १७ गरी ३९ जिल्लाको रहेका गृहकी जिल्ला कार्यक्रम संयोजक सिर्जना गौतमले जानकारी दिइन् ।
एक बर्षको अवधिमा संस्थाको बाँके जिल्ला स्थित रहेका ५ वटा सूचना तथा परामर्श केन्द्रबाट ६४ जिल्लाका ६ हजार ३ सय ४० जनालाई सूचना तथा परामर्श दिएको सुवेदीले बताए । सुवेदीका अनुसार एक वर्षको अवधिमा मानव बेचबिखन तथा ओसारपसार सम्बन्धी चारवटा मुद्दा दर्ता भएका छन । “खुला सीमा भएकाे कारण र समुदाय स्तरमा प्राप्त मात्रामा सचेतनाका कार्यक्रमहरु संचालन गर्ने नसकिएको कारण मानव बेचबिखन रोकथाममा चुनौती छ”, उनले भने । छिटो धनी बन्ने चाहाना, देखासिकी, अवसरको खोजी, सामाजिक एंव् आर्थिक समस्याको कारण अवसर खोज्दा जोखिममा फस्ने खतरा रहेको उल्लेख गर्दै संयोजक सुवेदीले मानव बेचबिखनको बढि जोखिममा रहेकाको उमेर समूह १८ देखि २५ वर्ष रहेको जानकारी दिए ।
गृह बाँकेकी संयोजक सिर्जना गौतमले विगतमा भन्दा वर्तमानमा नयाँ–नयाँ तरिकाहरु अपनाएर मानव बेचबिखन तथा ओसारपसार गर्न थालिएको जानकारी दिइन् । आर्थिक वर्ष २०७९/८० मा भारतका विभिन्न स्थानमा जोखिममा परेका २२ जनालाई उद्धार पश्चात स्वदेश फिर्ता गरिएको छ भने संस्थामा खोजतलासका लागि परेका एक सय ७२ निवेदनहरु मध्ये एक सय २४ जना भेटिएको तथ्याङ्क छ ।
संस्थाले जिल्ला भित्र नरैनापुर स्थित रहेको सुईया/बगौडा नाका, डुडुवा स्थित रहेको खडैचा नाका, जानकी स्थित रहेको शिवपुरी नाका, नेपालगंज स्थित रहेको जमुनाहा नाका र कोहलपुरको बसपार्कमा समेत आफ्नो सूचना तथा परामर्श केन्द्र स्थापना गरी कार्यक्रम संचालन गर्दै आईरहेको छ ।
