बाँके-नेपालगन्ज भन्सार कार्यालयले लक्ष्य भन्दा दुई अर्ब ९० करोड कम राजस्व संकलन गरेको छ । सरकारले ल्याएको नयाँ नीतिका कारण लक्ष्य अनुसारको राजस्व संकलन गर्न नसकिएको नेपालगन्ज भन्सार कार्यालयले जनाएको छ ।
आर्थिक वर्ष २०७८–०७९ मा नेपालगन्ज भन्सार कार्यालयलाई २५ अर्ब २१ करोड २६ लाख ६२ हजार राजस्व संकलन गर्ने लक्ष्य दिइएको थियो । तर, गत आवमा २२ अर्ब ३१ करोड २६ लाख ९८८।५१ प्रतिशत राजस्व संकलन गरिएको सूचना अधिकारी समेत रहेका भन्सार अधिकृत नवकुल शर्माले बताए ।
‘यो अघिल्लो आर्थिक वर्षभन्दा एक अर्ब आठ करोड ७९ लाखले बढी हो, तर गत आर्थिक वर्षको लक्ष्य भन्दा दुई अर्ब ९० करोड कम हो,’ उनले भने । सरकारले बैंकिग कारोवारमा कडाई लगायत विभिन्न मालसामान आयातमा रोक लगाएका कारण राजस्व संकलन गर्न नसकिएको उनको भनाई छ । उनले गत आर्थिक वर्षमा अघिल्लो बर्ष भन्दा राजस्व असुली बढी संकलन भएको दावी गरे ।
‘अघिल्लो आव भन्दा गत आवमा लक्ष्य बढी दिइएको थियो । त्यसैले लक्ष्य पूरा गर्न सकेनौँ, तर अघिल्लो आर्थिक बर्षभन्दा धेरै राजस्व संकलन गर्न सफल भएका छौं,’ उनले भने । नेपालगन्ज नाकाबाट चिनी, टायल र तोरी, सस्र्यू, रायो तथा तिल आयातमा कमी भई राजस्व संकलन समेत घटेको छ ।
भन्सार अधिकृत नवकुल शर्माका अनुसार चिनी आयातबाट ३९ प्रतिशत कम राजस्ज संकलन भएको छ । त्यसैगरि, टायल १२ र तोरीजन्य बस्तु ३३ प्रतिशत कम राजस्व संकलन भएको छ । अघिल्लो आवमा १० करोड १४ लाख ८० हजार ६०५ किलोग्राम चिनी आयात भएकोमा गत आव ०७८–०७९ मा पाँच करोड ८८ लाख ६४ हजार ७४६ किलोग्राम आयात भएको छ ।
यसबाट एक अर्व १२ करोड ६० लाख ७३ हजार रुपैँया राजस्व कम संकलन भएको छ ।टायल आयातबाट पाँच करोड ७४ लाख ५१ हजार कम राजस्व संकलन भएको छ । त्यसैगरि तोरीजन्य बस्तु आयातबाट नौँ करोड ८८ लाख ७२ हजार रुपैँया कम राजस्व संकलन भएको छ ।
