जयपति ढकाल-मधेसी तथा मुस्लिम छात्राका लागि लक्षित गर्दै नेपालगन्जमा महिला कजेल स्थापना गरिएको छ । उच्च शिक्षाको अवसरबाट बन्चित हुन नदिन र आफ्नै मुलुकमा पढ्न पाउने अवसर प्रदान गर्न भन्दै मङ्गलप्रसाद महिला कलेजको स्थापना गरिएको नेपालगन्ज उपमहानगरपालिकाका प्रमुख डा. धवलशम्शेर राणाले बताउनुभयोे ।
उहाँका अनुसार, मंगल प्रसाद माध्यामिक विद्यालयले लिजमा दिएको १२ कठ्ठा जमिनमा निर्माण गरिएको महिला कलेज सञ्चालनका लागि नेपालगन्ज उपमहानगरपालिकाले करिब डेढ करोड रुपैयाँ बजेट विनियोजन गरेको छ । कलेज सन्चालन भएपछि नेपाली छात्राहरुलाई भारतमा गएर अध्ययन गर्नुपर्ने बाध्यता अन्त्य हुने छ ।
विशेषगरी मुस्लिम, मधेसी तथा पिछडिएका समुदायका छात्राहरुलाई उच्चशिक्षा अध्यापनका लागि मंगलप्रसाद महिला कलेजको स्थापना गरिएको हो ।
नेपालगन्ज उप–महानगरपालिका उप–मेयर उमा थापामगर कुनै पनि समुदायका छात्राको पहुँच उच्चशिक्षामा हुनु पर्ने बताउदै भन्नुभयो । ‘नेपालगन्जमा मुस्लिम, दलित समुदायका धेरै छात्राहरु उच्च शिक्षाबाट वञ्चित छन् । अझै पनि केही समुदायमा उच्चशिक्षाका लागि छात्राहरुलाई पढ्न खुलेर बाहिर नपठाउने गरिन्छ । त्यसैले उनीहरुलाई लक्षित गरेर यो कलेजको स्थापना गरिएको हो ।’
कलेजका प्रमुख रविन्द्र कुमार कर्ण कक्षा १२ पछिको अध्यापनका लागि पढ्न नपठाउने समुदाय नेपालगन्ज रहेका कारण उनीहरुलाई यस कलेजले समेट्न सक्ने बताउनुहुन्छ । उक्त कलेजलाई प्राविधिक कलेजका रुपमा विकसित गर्दै लैजाने र सहुलियतदरमा छात्राहरुलाई उच्च शिक्षा दिने उद्देश्य रहेको कर्णले बताउनुभयो ।
कर्णका अनुसार, उक्त कलेजमा बिबिए, बिबिएस, विआइटि, बिसिए, पाँच वर्षे बिएलएलबि तथा चार वर्षे बिए अध्यापन गराइने छ । कक्षा सञ्चालनको अनुमतिका लागि पूर्वाञ्चल विश्व विद्यालयसँग सम्बन्धनको प्रक्रिया सुरु गरेको छ ।
निर्माण सम्पन्न भएको छात्रा कलेज तीन तले रहेको छ भने कलेजमा ४० वटा कोठाहरु रहेका छन् । त्यस्तै आधुनिक शौचालय, जेनेटरलगायतको सुविधा कलेजमा रहेको छ । साथै कलेजमा टाढाबाट अध्यापन गर्न आउने छात्राका लागि होस्टेलको पनि व्यवस्था गर्ने योजना रहेको प्रमुख कर्णले
बताउनुभयो ।
उक्त कलेज ६ करोड लागतमा बनेको हो । सुरुमा सात करोड ५० लाख रुपैयाँको स्टिमेट भएता पनि स्टिमेटभन्दा कम रकममा कलेजको निर्माण कार्य सम्पनन भएको नेपालन्ज उप–महानगरपालिकाका आर्किटेक ईन्जिनियर नितेसकुमार शर्माले बताउनुभयो । शर्मामा अनुसार भवन भूकम्प प्रतिरोधात्मक एवम् आधुनिक बनेको छ ।
नेपालगन्ज उपमहानगरपालिकाको विशेष पहलमा महिला कलेज स्थापना भएको हो । नेपालगन्ज उपमहानगरपालिकाका प्रमुख डा. राणाले महिला कलेज आत्मनिर्भर नहुँदासम्म उपमहानगरपालिकाकाबाट सहयोग भइरहने बताउनुभयो ।
‘मेयरमा निर्वाचित हुदाँ मैले देखेको सपना आज साकार भएकोछ । नेपालगन्जमा गल्र्स स्कुल र महिला कलेज निर्माणमा उपमहानगर अग्रसर थियो आज दुवै सपना पुरा भयो ।’ उहाँले भन्नुभयोे–‘गल्स स्कुल र महिला कलेज स्थापना हुनुले नेपालगन्जको अर्को परिचय थपिएकोछ । यसलाई संस्थागत गर्न सबैले जिम्मेवार हुनुपर्छ ।’
विशेषगरि नेपालगन्जका मधेशी र मुस्लिम छात्रालाई लक्षित गरेर महिला कलेज बनाइएको छ । मंगल प्रसाद उमाविको १२ कठ्ठा जमिन लिजमा लिएर साढे ५ करोड लागतमा ४० कोठे तीन तले भवन बनाइएको हो ।
कलेजको उद्घाटन पूर्वाञ्चल विश्व विद्यालयका उपकुलपति प्राचार्य डाक्टर यादवराज कोइरालाले गर्नुभएको थियो । उहाँले मधेसी, मुस्लिम छात्राले आफ्नै ठाउँमा उच्च शिक्षा पढ्ने सुविधा अब पाउनेमा ढुक्क रहेको बताउनुभयो ।
