खजुरा, बाँके । सुशीला कोइराला प्रखर क्यान्सर अस्पताल खजुरा बाँकेका नव नियुक्त कार्यकारी निर्देशक डा. निरज भट्टराईको सम्मान तथा स्वागत कार्यक्रम सम्पन्न भएको छ।
अस्पताल परिवारद्वारा आयोजित कार्यक्रममा डा. भट्टराईलाई खादा, पुष्पगुच्छा तथा शुभकामना मन्तव्यसहित स्वागत गरिएको थियो। कार्यक्रममा चिकित्सक, नर्सिङ्गकर्मी, स्वास्थ्यकर्मी तथा कर्मचारीहरूले उहाँको नेतृत्वमा अस्पतालको सेवा प्रवाह, व्यवस्थापन क्षमता तथा क्यान्सर उपचार सेवाको गुणस्तर अझ सुदृढ हुने विश्वास व्यक्त गरेका थिए।
कार्यक्रमलाई सम्बोधन गर्दै डा. भट्टराईले अस्पताललाई क्यान्सर उपचार तथा अनुसन्धानको उत्कृष्ट केन्द्रका रूपमा विकास गर्दै बिरामीमैत्री, गुणस्तरीय र प्रभावकारी स्वास्थ्य सेवा प्रवाहमा केन्द्रित रहने प्रतिबद्धता व्यक्त गर्नुभयो। उहाँले संस्थागत सुशासन, सेवा विस्तार, स्रोत–साधनको प्रभावकारी परिचालन तथा स्वास्थ्यकर्मीबीचको सहकार्यलाई प्राथमिकतामा राखेर कार्य गर्ने बताउनुभयो।
सहभागीहरूले स्वास्थ्य क्षेत्रको लामो अनुभव, व्यवस्थापकीय दक्षता र नेतृत्व क्षमताले अस्पतालको संस्थागत विकास तथा क्यान्सर उपचार सेवाको विस्तारमा महत्वपूर्ण योगदान पुग्ने विश्वास व्यक्त गरेका थिए।
कार्यक्रममा अस्पताल परिवारले नव नियुक्त कार्यकारी निर्देशक डा. निरज भट्टराईलाई हार्दिक बधाई तथा सफल कार्यकालको शुभकामना व्यक्त गर्दै उहाँको नेतृत्वमा सुशीला कोइराला प्रखर क्यान्सर अस्पतालले सेवाको गुणस्तर, पहुँच र विश्वासनीयतालाई नयाँ उचाइमा पुर्याउने अपेक्षा गरेको छ।
