विनोद शाही मुगु, असार १३
सोरु गाउँपालिका र INF मुगुको संयुक्त टोलीले सोरु गाउँपालिका वडा नं. ९ कालैमा सञ्चालन भइरहेका विकास निर्माण तथा सामुदायिक कार्यक्रमहरूको स्थलगत अनुगमन सम्पन्न गरेको छ।
गाउँपालिका उपाध्यक्षको संयोजकत्वमा सम्पन्न संयुक्त अनुगमन टोलीमा इलाका प्रशासन कार्यालय सोरुकोटका प्रमुख भिमराज सेजुवाल, कृषि विकास शाखा, पूर्वाधार विकास शाखा, पशुपन्छी विकास शाखाका प्रतिनिधि तथा INF मुगुका सहजकर्ता विष्णु सिंह विकको सहभागिता रहेको थियो।
अनुगमनका क्रममा कालैस्थित कमल स्वावलम्बन समूहका २५ जना सदस्यसँग अन्तरक्रिया तथा अनौपचारिक छलफल गरिएको थियो। छलफलमा समूहले सञ्चालन गरेका गतिविधि, प्राप्त उपलब्धि, देखिएका चुनौती तथा आगामी योजनाबारे जानकारी लिइएको थियो।
त्यसैगरी INF मुगुको सहयोगमा निर्माण गरिएका धारा, फोहोर व्यवस्थापन खाल्डा तथा पानी ट्याङ्कीको अवस्थाको निरीक्षण गर्नुका साथै सोरु गाउँपालिकाबाट सञ्चालनमा रहेका सडक, भवन, खेलमैदान (फिल्ड), मन्दिर, आरनघर तथा पीसीसी बाटो लगायतका पूर्वाधार आयोजनाको स्थलगत अनुगमन गरिएको थियो।
अनुगमन टोलीले निर्माणाधीन योजनाहरूलाई तोकिएको मापदण्डअनुसार गुणस्तरीय रूपमा आसार मसान्तभित्र सम्पन्न गरी आवश्यक कागजातसहित भुक्तानी प्रक्रिया अगाडि बढाउन सम्बन्धित उपभोक्ता समिति तथा सरोकारवालाहरूलाई अनुरोध गरेको छ। साथै विकास आयोजनाहरूको दिगोपना, प्रभावकारिता र नियमित मर्मतसम्भारमा विशेष ध्यान दिन निर्देशनसमेत दिइएको छ।
सोरु गाउँपालिकाले स्थानीय सरकार, विकास साझेदार संस्था र समुदायबीचको सहकार्यलाई थप प्रभावकारी बनाउँदै विकास निर्माणका कार्यलाई समयमै सम्पन्न गर्न तथा सेवाप्रवाहलाई अझ गुणस्तरीय बनाउन यस्ता संयुक्त अनुगमनलाई निरन्तरता दिइने जनाएको छ।
