जाजरकोट — मध्यपश्चिम विश्वविद्यालय, कानुन संकायमा अध्ययनरत सातौं सेमेस्टरका विद्यार्थीहरूको एक सक्रिय टोलीले जाजरकोटको शिवालय गाउँपालिकाका विभिन्न वडाहरूमा पुगेर निःशुल्क कानुनी सचेतना अभियान तथा कानुनी सेवा शिविर सञ्चालन गरेको छ।
बुन प्रसाद जैसी (क्याप्टेन) को नेतृत्वमा रहेको उक्त टोलीमा शैलेन्द्र सिंह, धर्मेन्द्र मल्ल, आशिका भट्टराई र युवराज बिष्ट सहभागी छन्। टोलीले स्थानीय तहसम्म पुगेर नागरिकलाई आधारभूत कानुनी जानकारी प्रदान गर्नुका साथै कानुनी पहुँचबाट टाढा रहेका समुदायलाई सचेत बनाउने उद्देश्यले अभियान सञ्चालन गरेको जनाएको छ।
अभियानअन्तर्गत टोलीले विभिन्न वडा, विद्यालय तथा गाउँ–समुदायमा प्रत्यक्ष अन्तरक्रिया गर्दै कानुनी अधिकार, कर्तव्य, न्याय प्राप्तिका उपाय तथा दैनिक जीवनसँग जोडिएका कानुनी प्रावधानबारे जानकारी दिइरहेको छ। साथै, समाजमा देखिएका समसामयिक समस्या, विवाद तथा सम्भावित कानुनी जटिलताहरूलाई कसरी समाधान गर्न सकिन्छ भन्ने विषयमा स्थानीय बासिन्दासँग छलफल पनि गरिएको छ।
विद्यार्थीहरूले सञ्चालन गरेको यस कार्यक्रमले ग्रामीण भेगका नागरिकमा कानुनी चेतना अभिवृद्धि गर्नुका साथै न्यायमा पहुँच विस्तार गर्न महत्वपूर्ण योगदान पुर्याउने विश्वास लिइएको छ। स्थानीयले पनि यस्तो पहलले आफूहरूलाई कानुनबारे बुझ्न र समस्या समाधानका बाटो पहिल्याउन सहयोग पुगेको प्रतिक्रिया दिएका छन्।
कार्यक्रमलाई आगामी दिनहरूमा थप प्रभावकारी र व्यापक बनाउँदै अन्य क्षेत्रहरूमा समेत विस्तार गर्ने तयारी गरिएको टोलीले जनाएको छ।
