नेपालगंज, बाँके, चैत्र १७ — उपभोक्ताको स्वास्थ्यमा प्रत्यक्ष असर पार्ने दूषित खाद्य पदार्थ उत्पादन तथा बिक्री गर्ने व्यवसायीमाथि कारबाही तीव्र पारिएको छ। खाद्य प्रविधि तथा गुण नियन्त्रण कार्यालय, नेपालगंज ले खाद्य स्वच्छता तथा गुणस्तर ऐन, २०८१ विपरीत कार्य गरेको ठहर गर्दै दुई व्यवसायीविरुद्ध मुद्दा दायर गरेको जनाएको छ।
कार्यालयका अनुसार कोहलपुर–११ स्थित “अस्मिता चाउमिन उद्योग” ले दूषित भिनेगार उत्पादन तथा बिक्री गरेको तथा नेपालगंज उपमहानगरपालिका–८ स्थित “गौरी मार्ट” ले बाह्य रंग मिसाइएको मासदाल बिक्री–वितरण गरेको अभियोगमा चैत्र १७ गते बाँके जिल्ला अदालत मा मुद्दा दायर गरिएको हो।
कार्यालयले यस्ता गतिविधि उपभोक्ताको स्वास्थ्यमा गम्भीर जोखिम निम्त्याउने भएकाले अनुगमनलाई कडाइ गरिएको र दोषीमाथि कानुनी कारबाही अघि बढाइएको जनाएको छ।
यसअघि गत हप्तामात्रै बर्दियाको गुलरिया–५ स्थित “आनन्द ड्रिङ्किङ वाटर” विरुद्ध न्यूनस्तरको प्रशोधित पिउने पानी उत्पादन तथा बिक्री गरेको आरोपमा जिल्ला प्रशासन कार्यालय, बर्दिया मा मुद्दा दायर गरिएको थियो।
कार्यालयका अनुसार चालु आर्थिक वर्ष ०८२/८३ मा हालसम्म कुल सात वटा मुद्दा दायर भइसकेका छन्। बजारमा गुणस्तरीय खाद्य वस्तुको आपूर्ति सुनिश्चित गर्न आगामी दिनमा पनि अनुगमन र कारबाहीलाई अझ प्रभावकारी बनाइने जनाइएको छ।
