ललितपुर, २८ वैशाख २०८३ (११ मे २०२६)

क्वयेर युथ ग्रुपको आयोजनामा आज ललितपुरमा एक महत्त्वपूर्ण सरोकारवाला परामर्श तथा अन्तर्क्रिया कार्यक्रम सम्पन्न भएको छ। ललितपुर महानगरपालिकाका पदाधिकारी, सुरक्षा निकायका प्रतिनिधि र कानुनी विज्ञहरूको उपस्थितिमा यौनिक तथा लैङ्गिक अल्पसङ्ख्यक समुदायका मुद्दाहरू र आगामी कार्यदिशाबारे गहन छलफल भएको हो। कार्यक्रममा ललितपुर महानगरपालिकाकी उप-प्रमुख मञ्जली शाक्यको प्रमुख आतिथ्यता रहेको थियो भने नेपाल प्रहरीका डीएसपी हेमन्त भण्डारी, महानगरपालिकाकी शाखा प्रमुख सरिता महर्जन, ल ल्याब नेपालका अधिवक्ता प्रज्वल राज ज्ञवाली, क्वयेर युथ ग्रुपकी प्रमुख कार्यकारी अधिकृत रुक्शना कपाली र बोर्ड सदस्य सफल लामा लगायतका सरोकारवालाहरूको सक्रिय सहभागिता रहेको थियो।

कार्यक्रमको सुरुवात संस्थाकी कार्यकारी निर्देशक विमला श्रेष्ठले स्वागत मन्तव्यमार्फत गर्नुभएको थियो भने कार्यक्रमको सञ्चालन कार्यक्रम अधिकृत पूजन गौतमले गर्नुभएको थियो। सो अवसरमा क्वयेर युथ ग्रुपले कानुनी सहायता र नीतिगत वकालतको क्षेत्रमा गरिरहेका कार्यहरूका बारेमा विस्तृत प्रस्तुतीकरण गरिएको थियो। खुल्ला छलफलका क्रममा सरोकारवालाहरूले समुदायको उत्थानका लागि विभिन्न रचनात्मक सुझावहरू प्रस्तुत गरेका थिए। जसमा मुख्य गरी सामाजिक लाञ्छना हटाउन र लुकेर रहेका व्यक्तिहरूलाई सहज वातावरण बनाउन स्थानीय स्तरमा सचेतना फैलाउनुपर्ने र संस्थाको कार्यक्षेत्रलाई काठमाडौं बाहिरका प्रदेश र ग्रामीण भेगसम्म विस्तार गर्नुपर्नेमा जोड दिइएको थियो।

यसैगरी, समुदायका सदस्यहरूलाई आर्थिक रूपमा स्वतन्त्र बनाउन रोजगारी, सीपमूलक तालिम र उद्यमशीलतामा जोड्नुपर्ने आवश्यकता औंल्याइयो। सहभागीहरूले आधिकारिक तथ्याङ्कको अभावमा नीति निर्माणमा समस्या हुने भएकाले व्यवस्थित डाटाबेस निर्माण गर्न र यौनकर्मीहरूका मुद्दामा गहन अनुसन्धान गर्न सुझाव दिएका थिए। कानुनी र प्रशासनिक झन्झट अन्त्य गर्न कर्मचारी र सुरक्षाकर्मीहरूलाई सचेत गराउनुका साथै देशभरका निःशुल्क सेवा दिने वकीलहरूसँगको समन्वयलाई सुदृढ बनाउनुपर्ने विषयमा पनि छलफल भएको थियो। यसका साथै ज्येष्ठ महिलावादी संस्थाहरूसँगको सहकार्य र बजेटलाई बैठकहरूमा मात्र सीमित नगरी प्रत्यक्ष सामुदायिक हित र शैक्षिक पाठ्यक्रम विकासमा लगानी गर्नुपर्ने सुझाव प्राप्त भएको छ।

कार्यक्रमको समापन गर्दै प्रमुख कार्यकारी अधिकृत रुक्शना कपालीले शिक्षा, स्वास्थ्य र लोकसेवा जस्ता क्षेत्रमा समुदायले अझै पनि ठूलो सङ्घर्ष गर्नुपरेको र एउटै अधिकारका लागि पटक-पटक कानुनी लडाइँ लड्नुपर्ने बाध्यता रहेको बताउनुभयो। उहाँले ललितपुर महानगरपालिका र क्वयेर युथ ग्रुपको संयुक्त सहकार्यमा मानिसहरूलाई सचेत गराउन सकिएमा मात्रै सबैको साझा जित हुने विश्वास व्यक्त गर्नुभयो।