प्रकाश प्रसाद काफ्ले । नेपाल कम्युनिस्ट पार्टी (एमाले) जाजरकोटले आगामी फागुन २१ गते हुने प्रतिनिधिसभा निर्वाचनका लागि युवा तथा विद्यार्थी आन्दोलनबाट उदाएका नेता नारायण घर्तीको नाम उम्मेदवारका रूपमा सिफारिस गरेको छ।
आज बसेको एमाले जाजरकोट जिल्ला कमिटीको बैठकले घर्तीसहित निरज आचार्य, डम्बरबहादुर सिंह, कौसिला खत्री र गणेश थापालाई प्रतिनिधिसभा निर्वाचनका लागि सिफारिस गर्ने निर्णय गरेको हो।
नारायण घर्तीले २०५८ सालमा जाजरकोटस्थित त्रिभुवन उच्च माध्यमिक विद्यालयबाट अखिल (अनेरास्ववियु) मा आबद्ध हुँदै राजनीतिक यात्रा सुरु गरेका थिए। विद्यार्थी आन्दोलनमा निरन्तर सक्रिय रहँदै उनले २०६७ सालमा अखिलको केन्द्रीय सदस्य, २०७२ मा सचिवालय सदस्य, र २०७६ मा उपमहासचिव तथा संगठन विभाग प्रमुखको जिम्मेवारी सम्हाले। संगठन निर्माण र विस्तारमा प्रभावकारी भूमिका खेलेका घर्ती २०७९ सालमा अखिलको उपाध्यक्ष बनेका थिए।
एमालेको ११औँ राष्ट्रिय महाधिवेशनमा ४० वर्षमुनिका युवाको प्रतिनिधित्व गर्दै केन्द्रीय सदस्यको तयारी गरेका घर्तीले संगठनलाई युवामैत्री, गतिशील र वैचारिक रूपमा सबल बनाउन उल्लेखनीय योगदान पुर्याउँदै आएका छन्। उनी सधैं जनताको बीचमा रहने, जनताकै पक्षमा उभिने र व्यवहारमै जनप्रेमी नेतृत्व प्रस्तुत गर्ने नेताका रूपमा परिचित छन्।
विशेषगरी जाजरकोट भूकम्पको कठिन समयमा घर्ती जनताकै बीचमा रहेर सबैभन्दा बढी खटिने युवा नेतामध्ये एक बनेका थिए। विपद् व्यवस्थापन, राहत र पुनःस्थापनामा देखाएको सक्रियताले उनीप्रति जनविश्वास अझ मजबुत बनेको छ।
गरिब परिवारको झुपडीबाट संघर्ष गर्दै हुर्किएका घर्ती सरल, मिजासिला, निडर, अनुशासित र विकासप्रेमी युवा नेता हुन्। जाजरकोटका हरेक उमेर समूहमा लोकप्रियता कमाएका घर्तीलाई पार्टीभित्र मात्र होइन, आम जनताले पनि भरोसायोग्य नेतृत्वका रूपमा हेर्ने गरेका छन्।
एमाले जाजरकोटले युवाशक्ति, अनुभव र जनसमर्थनको संयोजनका रूपमा नारायण घर्तीलाई प्रतिनिधिसभा निर्वाचनमा प्रभावकारी उम्मेदवारको रूपमा अघि सारेको जनाएको छ।
