मुगु — सोरू गाउँपालिका वडा नम्बर ६ ले आर्थिक वर्ष २०८२/०८३ को वार्षिक स्वीकृत बजेटबाट सञ्चालन गरिएको “वडा अध्यक्षसँग अपाङ्ग, ज्येष्ठ नागरिक तथा एकल महिला” कार्यक्रमअन्तर्गत लक्षित वर्गलाई न्यानो कपडा वितरण गरेको छ।
बुधबार दिउँसो आयोजित कार्यक्रममा वडा अध्यक्ष श्री बबरजंग शाही ले वडा भित्रका अपाङ्गता भएका ८ जना, एकल महिला ३५ जना, ज्येष्ठ नागरिक ५७ जना तथा क्षेत्र तोकिएका ज्येष्ठ नागरिक ७७ जना गरी जम्मा १७७ जना लाभग्राहीहरूलाई न्यानो कपडा वितरण गर्नुभएको हो। वडा कार्यालयका अनुसार प्रत्येक लाभग्राहीलाई १० मिटरका दरले सुती कपडा प्रदान गरिएको छ।
कार्यक्रमलाई सम्बोधन गर्दै वडा अध्यक्ष शाहीले चिसो मौसमका कारण अपाङ्गता भएका व्यक्ति, ज्येष्ठ नागरिक तथा एकल महिलाहरू बढी जोखिममा रहने भएकाले उनीहरूलाई राहत तथा सहारा दिने उद्देश्यले कार्यक्रम सञ्चालन गरिएको बताउनुभयो। उहाँले यस्ता सामाजिक सुरक्षामूलक कार्यक्रमहरूले लक्षित समुदायको जीवनस्तर सुधारमा सकारात्मक प्रभाव पार्ने विश्वास व्यक्त गर्नुभयो।
वडा कार्यालयका कर्मचारी कर्ण बहादुर शाही ले वडा भित्रका वास्तविक र योग्य लाभग्राहीहरूको पहिचान गरी पारदर्शी र निष्पक्ष ढंगले न्यानो कपडा वितरण गरिएको जानकारी दिनुभयो। उहाँका अनुसार आगामी दिनहरूमा पनि वडा कार्यालयले लक्षित वर्गलाई प्राथमिकतामा राखी यस्ता कार्यक्रमहरूलाई निरन्तरता दिनेछ।
कार्यक्रमबाट लाभग्राहीहरूमा खुसीयाली छाएको छ। उनीहरूले चिसो मौसममा न्यानो कपडाले राहत मिलेको भन्दै वडा कार्यालयप्रति आभार व्यक्त गरेका छन्।
