प्रकाश काफ्ले सुर्खेत- कालिकोट जिल्लाको महावै गाउँपालिका–२ मा अवस्थित देव आधारभूत विद्यालयका युवा विद्यालय व्यवस्थापन समिति (वि.व्य.स.) अध्यक्ष राजेन्द्र काफ्ले फुर्सदको समय आफ्नै विद्यालयमा पठनपाठनमा सहयोग गर्दै उदाहरणीय भूमिका निर्वाह गर्दै आएका छन्।
२२ वर्षकै उमेरमा देव आधारभूत विद्यालयको वि.व्य.स. अध्यक्षमा निर्वाचित काफ्ले समाजमा सकारात्मक परिवर्तनको चाहना राख्ने, परिवर्तनकारी सोच भएका र समाजसेवामा सधैं अग्रसर युवाका रूपमा परिचित छन्। उनी आफू अध्ययन गरेको विद्यालयलाई नै पहिलो पाठशालाका रूपमा स्मरण गर्दै त्यसको शैक्षिक उन्नति र विकासमा सक्रिय छन्।
हाल स्नातक तहमा अध्ययनरत काफ्लेले प्राविधिक धारमा डिप्लोमा समेत पूरा गरिसकेका छन्। पढाइमा मिहिनेत र लगनशीलता देखाउँदै आएका उनी समाजका विभिन्न सामाजिक तथा शैक्षिक गतिविधिमा पनि निरन्तर संलग्न रहँदै आएका छन्। आफू वि.व्य.स. अध्यक्षमा निर्वाचित हुनुको मुख्य उद्देश्य विद्यालयको समग्र प्रगति र गुणस्तरीय शिक्षाको सुनिश्चितता भएको उनको भनाइ छ।
धेरैजसो युवाहरू विदेश पलायन भइरहेको वर्तमान अवस्थामा गाउँमै अध्ययनरत विद्यार्थीहरूले गुणस्तरीय शिक्षा प्राप्त गर्न सके आफू सन्तुष्ट हुने काफ्ले बताउँछन्। अध्यक्ष बनेपछि विद्यालयमा नियमित अनुगमन, विद्यार्थीको आवश्यकता अनुसार अतिरिक्त क्रियाकलाप सञ्चालन तथा शिक्षाक्षेत्रमा काम गर्ने विभिन्न संघ–संस्थासँग सहकार्य गरी पठनपाठनलाई सक्रिय बनाइएको उनको दाबी छ।
विद्यालयमा शिक्षक अनुपस्थित हुने वा खाली पिरियड पर्ने अवस्थामा आफू स्वयं कक्षामा गएर पठनपाठन गराउने गरेको काफ्लेले जानकारी दिए। हाल अङ्ग्रेजी विषयमा स्नातक अध्ययन गर्दै आएका उनी शिक्षामार्फत समाज रूपान्तरण सम्भव हुने विश्वास राख्दै निरन्तर क्रियाशील छन्।
