प्रकाश काफ्ले । अनेरास्ववियुद्वारा सञ्चालन गरिएको मेची–महाकाली विद्यार्थी जागरण यात्रा सुर्खेतमा भव्य रूपमा सम्पन्न भएको छ। अनेरास्ववियु कर्णाली प्रदेश कमिटीको आयोजनामा सम्पन्न उक्त कार्यक्रम संयोजक धर्म शाहीको अध्यक्षता, अनेरास्ववियु केन्द्रीय कमिटीका अध्यक्ष दीपक धामीको प्रमुख आतिथ्यता तथा संगठनकी महासचिव अन्जना सिवाकोटी र नेकपा (एमाले) कर्णाली प्रदेश कमिटीका उपाध्यक्ष टेकराज पछाईको विशेष आतिथ्यतामा सम्पन्न भयो।
कार्यक्रमलाई सम्बोधन गर्दै प्रमुख अतिथि दीपक धामीले समाजका लागि निरन्तर योगदान पुर्याउने व्यक्तिहरूलाई अपमानको नाम टाँसिने प्रवृत्ति बढ्दै गएको विषयमा गम्भीर प्रश्न उठाए। पछिल्लो समयमा विभिन्न बहाना र मिथ्या आश्वासनका आधारमा सत्तामा पुगेकाहरूले विद्यार्थीका सरोकारमा कुनै ठोस काम नगरेको आरोप पनि उनले लगाए। क्याम्पसमा विद्यार्थी हितका विषयमा क्रियाशील विद्यार्थी नेताहरू गलत ठहरिन नहुने उनले स्पष्ट पारे।
अध्यक्ष धामीले जनताले पठाएका प्रतिनिधिमाथि कारबाही गर्ने अधिकार जनताकै हातमा रहेको उल्लेख गर्दै, अधिकारको दुरुपयोग गर्दै देशलाई अस्थिरता र अव्यवस्थातर्फ धकेल्ने गतिविधिप्रति विद्यार्थीहरू अत्यन्त सचेत हुनुपर्नेमा जोड दिए। राष्ट्रिय स्वाधीनता, राष्ट्रिय अखण्डता र नेपालको सार्वभौमसत्ताको रक्षाका लागि युवा विद्यार्थीबीच मजबुत एकता आवश्यक रहेको उनले बताए।
उनका अनुसार अबदेखि क्याम्पस, जिल्ला र प्रदेश तहमा रहेका विद्यार्थी नेताहरूले आफ्नो–आफ्नो क्षेत्रका त्रुटि, अराजकता र गलत अभ्यास विरुद्ध कठोर खबदारी गर्नेछन्। युवाशक्तिले मात्र देशमा वास्तविक परिवर्तन ल्याउन सक्ने भएकाले सबै युवा विद्यार्थीलाई विकास, सुशासन र सकारात्मक रूपान्तरणका अभियानमा एकजुट हुन उनले आह्वान गरे।
अनेरास्ववियु पढेका, बौद्धिक, सचेत तथा राष्ट्रप्रेमी युवा विद्यार्थीहरूको संगठित समूह भएको उल्लेख गर्दै अध्यक्ष धामीले संगठनभित्र हुने सबै प्रकारका सांगठनिक अराजकता संगठनका लागि घातक हुने बताए। विद्यार्थीहरूकै बीचबाट उदाएका, सक्रिय र अग्रसर व्यक्तिलाई नेतृत्वमा प्रोत्साहित गर्ने नीतिबारे पनि उनले जानकारी गराए।
कार्यक्रममा महासचिव अन्जना सिवाकोटी र उपाध्यक्ष टेकराज पछाईले पनि विद्यार्थी हित, शैक्षिक सुधार तथा नेतृत्व विकासका कार्यक्रमलाई अनेरास्ववियुले निरन्तर प्राथमिकतामा राख्दै आएको बताएका छन्।
