जयपति ढकाल नेपालगञ्ज । बाँकेको कोहलपुर–१४ स्थित हुलास खाद्य उद्योग प्रा.लि. मा गरिएको आकस्मिक अनुगमनका क्रममा ठूलो परिमाणमा म्याद गुज्रिएको आँटा फेला परेपछि नियामक निकायले तत्काल कडा कारबाही गरेको छ।
खाद्य प्रविधि तथा गुण नियन्त्रण कार्यालय नेपालगञ्जको टोलीले गरेको निरीक्षणमा ९१ बोरा (४,५५० किलोग्राम) म्याद सकिएको आँटा गोदाममै लुकाइ राखिएको अवस्थामा भेटिएको हो।
कार्यालय, जिल्ला प्रशासन, वडा जनप्रतिनिधि र उद्योग व्यवस्थापकको रोहवरमा ती सबै स्टक उद्योग परिसरमै खाल्डो खनेर पूर्ण रूपमा नष्ट गरिएको छ।
कुन–कुन ब्याचको आँटा नष्ट भयो?
• ब्याच नं. ३६ – ३० बोरा
• उत्पादन: २०८२ साउन ९
• म्याद: २०८२ असोज ८
• ब्याच नं. ४० – ३६ बोरा
• उत्पादन: २०८२ साउन १५
• म्याद: २०८२ असोज १४
• ब्याच नं. ४७ – २५ बोरा
• उत्पादन: २०८२ भदौ २४
• म्याद: २०८२ कात्तिक २३
अनुगमनको दिनसम्म यी सबै स्टक ४३ देखि ६५ दिनसम्म म्याद गुज्रिसकेको पुष्टि गरिएको थियो। बजार मूल्य करिब रु. २ लाख ६४ हजार बराबरको यो सम्पूर्ण मात्रा तत्काल डम्प गरिएको हो।
निरीक्षण टोली र निर्देशन
अनुगमन टोलीमा
• वरिष्ठ खाद्य अनुसन्धान अधिकृत प्रशान्त पोखरेल,
• खाद्य अनुसन्धान अधिकृत रामहरी लामिछाने,
• जिल्ला प्रशासन कार्यालय
• जिल्ला प्रहरी कार्यालय बाँकेका प्रतिनिधिहरू
सहभागी थिए।
कार्यालयले उद्योगलाई ३ दिनभित्र सबै म्याद गुज्रिएको स्टक नष्ट गर्न तथा२४ घण्टाभित्र उत्पादन–बिक्री–स्टकको पूरा अभिलेख पेश गर्न लिखित रूपमा निर्देशन दिएको थियो। निर्देशनअनुसार बिहीवार उक्त आँटा नष्ट गरिएको हो।
अनुगमनले देखायो गम्भीर कमजोरी
निरीक्षणका क्रममा उद्योगमा
• सरसफाई सामान्य मात्र
• खाद्य वस्तुको ट्रेसेबिलिटी प्रणाली पूर्ण रूपमा अभाव
• प्याकिङ ट्याग आधा बोरा भित्र पस्ने, म्याद अस्पष्ट देखिने
• प्रिन्टेड कागज सिधै आँटा/मैदासँग सम्पर्कमा पर्ने जोखिमपूर्ण अभ्यास
जस्ता गम्भीर त्रुटिहरू भेटिएका थिए।
उपभोक्ता स्वास्थ्य जोखिममा
हालै म्याद गुज्रिएका तथा गुणस्तरहीन खाद्य पदार्थका उजुरी बढेपछि खाद्य प्रविधि तथा गुण नियन्त्रण कार्यालय नेपालगञ्ज ले अनुगमन तिब्र पारेको छ।
बाजारमा विश्वसनीय मानिने ठूला ब्रान्डले नै उपभोक्ताको स्वास्थ्यसँग खेलवाड गर्नु गम्भीर अपराध भएको भन्दै उपभोक्ताहरूले कडा कारबाहीको माग गर्दै आएका छन्।
