विनोद शाही मुगु, जेठ ३०– मुगु जिल्लाको सोरु गाउँपालिकामा खेलकुद र पर्यटन क्षेत्रको विकासका लागि संघीय सरकारले झन्डै ६ करोड रुपैयाँ बजेट विनियोजन गरेको छ। सोरु गाउँपालिका उपाध्यक्ष तथा पालिका परिवारको विशेष पहलमा प्राप्त यो बजेटले स्थानीय पूर्वाधार निर्माणसँगै रोजगारी सिर्जना हुने विश्वास गरिएको छ।
बजेटअनुसार, वडा नं. ६ सोरुकोटको पोखरीचौर क्षेत्रमा गाउँपालिका स्तरीय रंगशाला निर्माण गरिनेछ, जुन स्थानमा पहिले “प्रथम उपाध्यक्ष फुटबल कप” आयोजना गरिएको थियो। यसका लागि ३ करोड रुपैयाँ बजेट विनियोजन भएको छ।
त्यस्तै, वडा नं. ६ स्थित कर्णाली नदी किनारमा रहेको तातोपानी क्षेत्र—जहाँ धार्मिक, ऐतिहासिक र प्राकृतिक महत्त्व बोकेको गुफा र कुण्ड रहेका छन्—त्यहाँको पर्यटन पूर्वाधार निर्माणका लागि २ करोड ७६ लाख रुपैयाँ विनियोजन गरिएको छ।
गाउँपालिका स्रोतका अनुसार, यी परियोजनाहरू कार्यान्वयन भएसँगै स्थानीय नागरिकहरूलाई निर्माण कार्यमार्फत प्रत्यक्ष तथा अप्रत्यक्ष रोजगारीको अवसर प्रदान गरिनेछ। पूर्वाधार निर्माणले पर्यटन प्रवर्द्धनसँगै स्थानीय आर्थिक गतिविधिमा पनि सकारात्मक प्रभाव पार्नेछ।
सोरु गाउँपालिका उपाध्यक्ष ले आफ्नो फेसबुक बाल मार्फत उक्त बजेट सुनिश्चित गर्नमा सहकार्य गर्ने महानुभावहरूलाई धन्यवाद ज्ञापन सगै विशेष धन्यवाद ब्यक्त गर्नु भएको छ ।उक्त कार्यको लागि बिशेश पात्रमा वन तथा वातावरण मन्त्री ऐनबहादुर शाही, युवा तथा खेलकुद मन्त्री तेजुलाल चौधरी, राष्ट्रिय योजना आयोग सदस्य डा. आर.पी. बिच्छा, कार्मारोङ गाउँपालिका अध्यक्ष छिरिङ क्याप्ने लामा, ई. सञ्जय अधिकारी, जित नारायण चौधरी, समाजसेवी भुपेन्द्र मल्ल र आईटी अधिकृत सोबेन्द्र मल्ल रहेका छन्।
गाउँपालिकाले उपलब्ध बजेटको प्रभावकारी उपयोग गर्दै पर्यटन र खेलकुद पूर्वाधारलाई दिगो विकासको आधार बनाउने तयारी गरिरहेको जनाएको छ।
