मुगु, जेठ १५ – देशभर गणतन्त्र दिवस उत्साहपूर्वक मनाइरहँदा मुगु जिल्लाको सोरु गाउँपालिकामा पनि यस वर्ष गणतन्त्र दिवस विशेष कार्यक्रमसहित भव्य रूपमा मनाइएको छ।
गणतन्त्र दिवसको अवसरमा बिहान ८:०० बजे उपाध्यक्ष श्री केशर बहादुर शाही को संयोजकत्वमा नाराबाजी सहितको जुलुस निकालिएको थियो। जुलुसले बजार परिक्रमा गर्दै जनचेतनामूलक सन्देश प्रवाह गरेको थियो। साथै, बजार क्षेत्रको सरसफाइ अभियान समेत सञ्चालन गरिएको थियो, जसमा सोरु गाउँपालिका मुगुका कर्मचारी, जनप्रतिनिधि, शिक्षक, विद्यार्थी तथा सर्वसाधारणको उल्लेखनीय सहभागिता रहेको थियो।
बेलुका आयोजित औपचारिक कार्यक्रममा दीप प्रज्वलन गरिँदै रास्ट्रिय गान पछि शहीदहरूप्रति १ मिनेट मौनधारणा अर्पण गरिएको थियो। सो अवसरमा स्थानीय विद्यालयका विद्यार्थीहरूले देशभक्तिपूर्ण गीतमा आकर्षक नृत्य प्रस्तुत गरेका थिए, जसले दर्शकहरूको मन जितेको थियो।
सोरु गाउँपालिकाका उपाध्यक्षले कार्यक्रममा गणतन्त्रको महत्वमाथि प्रकाश पार्दै लोकतन्त्र, समानता र सहभागितामूलक शासन प्रणालीको अभ्यासलाई अझ सशक्त बनाउनु पर्नेमा जोड दिदै कार्यक्रम सम्पन्न गर्नु भएको थियो।
