जयपति ढकाल बाँके खाद्य प्रविधि तथा गुण नियन्त्रण कार्यालय नेपालगंजले मिति २०८२।०२।०५ गते सोमवार विर्यानी, शौर्मा र कबाव मा बाह्य सिन्थेटिक रंग राखी बनाएको र होटल फोहर गरेको कसुरमा नेपालगंज ११ इगाह रोडमा रहेको बिस्मिल्लाह होटल बिरुद्ध बाँके जिल्ला अदालतमा मुद्दा दायर गरेको छ ।
मिति २०८१/१२/१८ गते खाद्य प्रविधि तथा गुण नियन्त्रण कार्यालय, नेपालगंज उपमहानगरपालिका, वडा कार्यालय, वडा प्रहरी कार्यालय र पत्रकार सहित गएको संयुक्त अनुगमन टोलिले बाँके जिल्ला नेपालगंज उपमहानगरपालिका वडा नं. ११ स्थित बिस्मिल्ला केटर्स चिकन शोर्मा एण्ड बिरयानी होटल नामको बोर्ड राखेको तर घरेलु तथा साना उद्योग कार्यालय, बाँकेमा विस्मिल्ला होटल भनि दर्ता भएको (दर्ता नंः १४१३-११-२०८०/८१) को स्थलगत अनुगमन निरीक्षण गर्दा विर्यानी पकाउने ठाउँ खुल्ला रहेको, शौचालयसंग जोडिएको, अत्यधिक फोहोर अवस्था रहेको, झिंगा भन्केको, फ्रिजमा अत्यन्त फोहोर (दूषित) अवस्थामा मासु भण्डारण गरेको, Non-food grade प्लाष्टिकका भाडामा खानेकुरा (प्याज, राइता, ब्रेडक्रम, चिकन) भण्डारण गरेको, विरयानी र कवाफमा Synthetic food color प्रयोग गरेको, भण्डारण कक्ष अत्यन्त फोहोर रहेको, खानेकुरा अव्यवस्थित गरि राखेको, कच्चा पदार्थ भण्डारण गर्ने स्थानमा नै फोहोर फाल्ने, थुक्ने लगायत गर्ने गरेको पाइएको थियो ।
सो मुद्दा खाद्य निरिक्षण अधिकारी रामहरी लामिछानेद्वारा अनुसन्धान गरिएको थियो । यस कार्यालयले गत वैशाख १४ गते गोल्डेन प्रशधित पिउने पानी उद्योग बिरुद्ध समेत अनुमति नलिई तथा मापदण्ड पालना नगरेको अभियोगमा जिल्ला प्रशासन कार्यालयमा मुद्दा दायर गरेको छ। यस कार्यालयले हालसम्म कुल पाँच वटा मुद्दा दायर गरिसकेको सो कार्यालयका सूचना अधिकारी रामहरी लामिछानेले जानकारी दिनुभयो । यस कार्यालयले खाद्य स्वच्छता तथा गुणस्तर ऐन २०८१ र दाना ऐन २०३३ बमोजिम अनुगमन गर्ने, नमूना संकलन तथा परिक्षण गर्ने र ऐन विपरित कार्य गर्नेलाई कारवाही गर्ने लगायतका क्रियाकलाप गर्दै आएको छ ।
