नेपालगन्ज – तत्कालिन भौतिक पूर्वाधार तथा यातायात मन्त्री मोहम्मद
इश्तियाक राईले राँझा चोकमा २०७९ साल भदौ ४ गते ‘आकाशे पुल’को शिलान्यास
गर्दै राखेको एउटा स्तम्भ अहिले पनि देख्न सकिन्छ । तर शिलान्यास अनुसार
बन्नुपर्ने आकाशे पुल भने अहिलेसम्म बन्न सकेको छैन ।

हतारमा शिलान्यास गरेपछि माटो परीक्षणको काम समेत भयो । तर त्यसयता
निमार्णको कुनै काम अघि बढ्न सकेको छैन । बरु तत्कालिन अवस्थाको
डिजाइनलाई सच्याउन सडक डिभिजन कार्यालय नेपालगन्जले सडक बिभागमा पत्र
लेखेको छ । ‘रिभ्यु’ का लागि पठाएको पत्र स्वीकृत वा अस्वीकृत भयो भन्ने
एकिन नहुँदासम्म काम शुरु नहने निश्चितप्राय छ ।

आकाशेपुलको तत्कालिन डिजाइन ‘रिभ्यु’ गर्नुपर्ने अबस्था आउनु भनेकै
शिलान्यास हतारका भरमा गरिएको थियो भन्ने पुष्टि हुन्छ । कुनै परिपक्क
डिजाइन बिनानै निर्वाचन पूर्व (२०७९ मंसिरमा निर्वाचन) निर्वाचन प्रभावित
गर्ने उदेश्यले आकाशे पुलको शिलान्यास गरिएको आरोप लागेको छ ।

डायनामिक कन्सट्रक्सन नामक निर्माण कम्पनीसँग २०७९ कात्तिक २८ सम्झौता
भएपश्चात कम्पनीले सबैभन्दा पहिले राँझा चोकमै आकाशे पुल निर्माणका लागि
काम शुरु गरेको थियो । जबकी शिलान्यास भदौ ४ गते नै गरिएको थियो । आकाशे
पुल निर्माण गर्नका लागि खनिएको खाल्डो राँझा चोकमा अहिले धराममा परिणत
भएको छ । सडकछेउमै खनिएको खाल्डोमा न काम शुरु भयो नत पुर्ने काम भएको छ
। त्यसले सवारी दुर्घटनाको जोखिम बढाएको छ ।

सडक डिभिजन कार्यालय नेपालगन्जका सूचना अधिकारी जनक धामीले डिजाईन रिभ्यु
स्वीकृत हुने बित्तिकै काम शुरु हुने बताएका छन् । काम शुरु हुनेमा ढुक्न
हुन अनुरोध गर्दै धामीले भने,–‘बजेट फ्रिज हुने समस्या छैन । डिजाईन
रिभ्यु स्वीकृत हुने बित्तिकै पाँचवटै आकाशेपुलको काम शुरु हुन्छ ।’

धामीले दिएको जानकारी अनुसार राँझामा हालकै अवस्थामा पुल बनाउँदा
पूर्वछेउमा सिक्टा सिँचाईको डुडुवा नालामा पर्छ । नाला, उचाई र लम्बाई
बढाउनुपर्ने आबश्यकताका आधारमा डिजाइन रिभ्यु गर्नुपर्ने आवश्यकता महसुस
गरेर पहिले नै बजेट माग गरिएको धामी बताउँछन् ।

अब नयाँ डिजाइन स्वीकृत भएर आएपछि धमाधम काम सुरु हुने र तोकिएको
समयभित्रै काम सम्पन्न हुने धामी दाबी गर्छन् । निर्माण कम्पनीसँग
पाँचवटा आकाशे पुल १५ महिनाभित्र निर्माण सम्पन्न गर्नेगरी कात्तिक २८
गते सम्झौता गरिएको छ । पुलहरु निर्माण गर्नका लागि करसहित आठ करोड २१
लाख ४५ हजार रुपैयाँमा लागतको सम्झौता भएको छ ।
आकाशेपुल निर्माणमा भइरहेको ढिलाईका बारेमा नेपालगन्ज उपमहानगरपालिकाका
प्रमुख प्रशान्त बिष्टले चासो राखेका छन् । उनले डिजाई परिवर्तनको काम
हुने बित्तिकै निर्माण सम्बन्धी काम शुरु हुने आशा गरिएको बताएका छन् ।

नेपालगन्जमा २०७६ सालदेखि नै आकाशेपुल निर्माणको चर्चा चलेको थियो ।
आकाशे पुल बने पछी पैदल यात्रीलाई धेरै सहज हुने र दुर्घटनामा कमि आउने
बिश्वास गरिएको छ ।