नेपालगन्ज– नेपालगन्ज हुँदै पवित्र धार्मिकस्थल कैलाश मानसरोवर दर्शन गर्न जाने नेपाली तथा भारतीय पर्यटकको आकर्षण बढेको बेला लुम्बिनी प्रदेश सरकारका संस्थापक मुख्यमन्त्री शंकर पोखरेलले पाँच बर्षअघि बैजनाथ गाउँपालिका–६ मा मनसरोवरको प्रतीकात्मक प्रतिमूर्तीसहित बोटानिकल गार्डेन स्थापनाको योजना अघि सारे ।
योजना कार्यान्वयनका लागि बजेट बिनियोजन गरेका तत्कालिन मुख्यमन्त्री शंकर पोखरेलले पार्कको शिलान्यास पनि गरे । तर योजना अघि बढ्न सकेको छैन । योजना अघि बढाउन आगामी आर्थिक वर्षका लागि फेरी प्रदेश सरकारले बजेट बिनियोजन गरेको छ । सोहीक्षेत्रका प्रदेश सांसद रत्न खत्रीका अनुसार उक्त पार्कका लागि आगामी आर्थिक वर्षमा २० लाख बिनियोजन गरिएको बताए । अब उक्त योजना कार्यान्वयन हुने उनको भनाई छ ।
खासगरी भारतीय पर्यटक मानसरोवर दर्शन गर्न जाने गरेका छन् । त्यहाँ जाने पर्यटकको मन बहलाउन तथा मानसरोबर जान नसक्नेलाई मानसरोवरको प्रतीकात्मकका रूपमा बाँकेको वैजनाथ गाउँपालिका–६ मा मानसरोवरको प्रतीकात्मक उद्यानस्थल निर्माणको योजना अघि सारिएको थियो । करिब पाँच हेक्टर क्षेत्रफलमा प्रतिमूर्तिसहित बोटानिकल गार्डेन निर्माण प्रक्रिया अगाडि बढेको तर कार्यान्वयनमा सरोकारवाला निकायले उदासिनता प्रकट गरेका छन् ।
प्रदेश सरकार उद्योग, पर्यटन वन तथा वातावरण मन्त्रालयबाट विनियोजित रकममध्येबाट वनस्पति उद्यानको योजना अगाडि बढेको हो । न्यु हरियाली सामुदायिक वन उपभोक्ता समूहको जंगल हाताभित्र निर्माण हुने प्रतिकात्मकस्थल अन्तर्गत बोटानिकल गार्डेनसमेत निर्माण गरिने भनिएको छ । निर्माणको ठेक्का राज निर्माण सेवा नेपालगन्जसँग एक करोड ६ लाख आठ हजार २९१ मा भएको थियो भने २०७६ पुस २४ गते सम्झौता भएको निर्माण कार्यको २०७७ असार २५ गतेसम्म सम्पन्न हुने गरी काम सुरु गर्ने लक्ष्य थियो । जुन लक्ष्य पुरा भएको छैन । भौगोलिक विकटता र खर्च धेरै लाग्ने भएकाले अधिकांश मानसरोवर पुग्न नसक्ने पर्यटकलाई लक्षित गरेर निर्माण हुन थालेको हो ।
