नेपालगन्ज– नेपालगन्ज उप–महानगरपालिका–१८ मा सिंचाईका लागि गत आर्थिक वर्षमा ६४ वटा बोरिङ्ग जडान गरिएको छ । वडाभर बोरिङ्ग जडान गरेपछि कृषकलाई खेतीकिसानीका लागि आकाशेपानीको भर पर्ने बाध्यता हटेको वडा अध्यक्ष दिपक बर्माले बताए । पानी नपरेर अन्तका कृषक धान रोप्न नपाएर हैरान भएका बेला कारकाँदोका कृषकहरु खेतीपातीमा जुटेका छन् ।

‘अब हामीलाई पानी नपर्ला र खेत बाँझै होला भन्ने चिन्ता छैन ।’ वडा अध्यक्ष बर्मा भन्छन्, –‘सिचाई सुविधाको पर्याप्त व्यवस्था गरेका छौं ।’ आर्थिक बर्ष ०७९ ÷८० मा कृषि सिंचाइका लागि संघीय सरकारबाट प्राप्त झण्डै ३५ लाख बजेटबाट बोरिङ्ग जडान गरिएको हो । त्यसमा डिप बोरिङ्ग समेत रहेको छ ।

‘बोरिङ्ग जडान कार्य सम्पन्न गरेका छौं । यस कार्यमा बजेट उपलब्ध गराउने संघिय सरकारका खटिने प्राविधिक, बोरिङ्ग जडानका गर्ने टीमको अथक मिहिनेत रह्यो ।’– बर्माले भने । काँरकादोमा शहरीकरण बढ्दै गएपनि अझै खेतीयोग्य जमिनको उपलब्धता रहेको छ । धेरै कृषकहरुले धान, गहुँ, मसुरो लगायतका खेती गर्दै आएका छन् ।

उनीहरु हालसम्म आकाशेपानीको भरमा खेती गर्दै आएका थिए । सदाबहादर खेतीको लागि पर्याप्त मात्रामा सिंचाईको आवश्यकता महसुस गरेपछि वडा अध्यक्ष बर्माले बोरिङ्गका लागि पहल गरेका थिए । उनकै पहलपछि संघीय सरकारको तर्फबाट प्राप्त बजेटबाट सिंचाईको व्यवस्था गरिएको हो ।