बाँके– हुम्लाको ताँजाकोट गाउँपालिका-१ को जनप्रकाश माध्यामिक विद्यालयलाई नेपालगन्जको स्प्रिङडेल एकेडेमीले ठूलो मात्रामा फर्निचर सामाग्री वितरण गरेको छ ।
मंगलवार एक कार्यक्रमकाबीच बिद्यालयले ६० वटा फर्निचर सामाग्री हस्तान्तरण गरेको प्रिन्सिपल शरदचन्द्र रावलले बताए ।
बुधबारदेखि परेको अविरल वर्षाको कारण विद्यालयको कक्षा कोठामा भल पसेर हिलाम्मे हुँदा हुम्ला ताँजाकोट गाउँपालिका-१ को जनप्रकाश माध्यमिक विद्यालयका विद्यार्थी चौरमा बसेर पढ्न बाध्य भएका भएको समाचार सार्बजनिक भएपछि सामाजिक उत्तरदायित्व सम्झिएर सहयोग गरेको रावलले बताए ।
तीन दिनसम्म लगातार भएको वर्षाले कक्षा कोठामा भलबाढी पसेपछि जनप्रकाश माध्यमिक विद्यालय काँडागाउँका विद्यार्थीहरू खुला चौरमा बसेर पढ्न बाध्य छन् ।
गत वर्ष असोजमा परेको वर्षाले विद्यालयको पछाडिको भागमा पहिरोे गएका कारण पानी पर्ने बित्तिकै सबै कक्षा कोठामा भल छिर्ने भएकाले पहिरो नियन्त्रण नभएसम्म यो समस्या बारम्बार भोग्नुपर्ने अवस्था रहेको जनप्रकाश माध्यमिक विद्यालयका प्रधानाध्यापक दलपति खड्काले बताए ।
विद्यालयमा भल पसेपछि ६ वटा कोठा हिलाम्मे भएका छन् । कक्षा ३, ६, ७, ८, ९ र १० कक्षा गरी ६ वटा कोठामा हिलाम्मे पानीको भल पसेपछि सबै विद्यार्थीलाई चौरमा राखेर पढाउन थालिएको थियो । अब भने राहत हुने उनले बताए ।
