नेपालगन्ज “खाद्य पदार्थमा मापदण्ड, जीवन रक्षाको आधारस्तम्भ” भन्ने मूल नारा सहित विश्व खाद्य स्वच्छता दिवस (७ जून २०२३) को अवसरमा खाद्य प्रविधि तथा गुण नियन्त्रण कार्यालय, नेपालगंज, बाँकेको आयोजना, खाद्य आयात निर्यात गुणस्तर प्रमाणिकारण कार्यालय, बाँके तथा नेपाल खाद्य वैज्ञानिक तथा प्राविधिज्ञ संघ (NEFOSTA) मध्य पश्चिम इकाईको सह-आयोजनामा विहान ८ बजे प्रभातफेरी सम्पन्न भएको छ।
प्रभातफेरी कार्याक्रम खाद्य प्रविधि तथा गुण नियन्त्रण कार्यालय, नेपालगंज, बाँकेको परिसरबाट सुरु गरी नेपालगंजको व्यस्त बजार त्रिभुवन चोक हुँदै मूल सडक विपी चोक परिक्रमा गरी कार्यालय परिसरमा आइ सम्पन्न भएको थियो।
प्रभातफेरी कार्यक्रममा खाद्य स्वच्छता सम्बन्धी “Safer Food, Better Health”, “खाद्य पदार्थमा स्वच्छता, हामी सबैको प्रतिबद्धता”, “कृत्रिम रंग हालिएको खाद्य पदार्थलाई दुरुत्साहन गरौँ” “स्वच्छ सन्तुलित आहार, स्वस्थ जीवनको आधार”, “पत्रपत्रिकामा राखेर खानेकुरा नखाऔँ”, “प्रस्ट लेवल देखिने खाद्यवस्तुको मात्र उपभोग गरौँ”, “Food, if not safe is not food”, “खाद्य स्वच्छता आँफैबाट प्रारम्भ हुन्छ”, “एन्टीमाइक्रोबियल प्रतिरोध बारे नगरे विचार, भोलि हुने छैन उपचार” लगायतका विभिन्न प्लेकार्ड सहित विभिन्न सरकारी कार्यालयका प्रतिनिधि, उद्योगी, व्यवसायी, उपभोक्ता अधिकारकर्मी, पत्रकार सहभागी भएका थिए।
यसै क्रममा खाद्य आयात निर्यात गुणस्तर प्रमाणीकरण कार्यालयका कार्यालय प्रमुख सन्तोष दाहालले “खाद्य स्वच्छताको विषय कुनै एक व्यक्ति वा संस्थाको मात्र प्रयासले सफल नहुने, यसका लागि खाद्य शृंखलाका सबै सरोकारवालाहरुको सामुहिक प्रयास आवश्यक रहने” विचार व्यक्त गर्नुभयो।प्रभातफेरीमा उपस्थित सहभागीहरुले खाद्य संवेदनशील क्षेत्र भएकैले खाद्य कार्यालयहरुले आयोजना गरेको यो कार्यक्रममा सहभागी भएको बताएका थिए।
