नेपालगन्ज – खाद्य पदार्थमा मापदण्ड, जीवन रक्षाको आधारस्तम्भ” भन्ने नारा सहित नेपाल खाद्य बैज्ञानिक तथा प्राविधिज्ञ संघ (NEFOSTA) मध्य पश्चिम ईकाइ नेपालगन्ज, खाद्य प्रविधि तथा गुण नियन्त्रण कार्यालय नेपालगन्ज र खाद्य आयात निर्यात गुणस्तर प्रमाणिकरण कार्यालय नेपालगन्जले संयुक्त रुपमा नेपालगन्जमा सप्ताहव्यापी विश्व खाद्य स्वच्छता दिवस मनाउने भएका छन ।
खाद्य पदार्थमा हुने मिसावट कम गर्न तथा स्वच्छता र गुणस्तर कायम राख्न विभिन्न प्रचारात्मक कार्यक्रम सहित सप्ताहव्यापी कार्यक्रम गरि दिवस मनाउने गरिएको हो।
खाद्य स्वच्छता र गुणस्तरको महत्वलाई आम जनमानसमा पुर्याउन नेपालले १५ वर्ष अघि देखि शुरु गरेको खाद्य स्वच्छता दिवसको अभियानलाई समर्थन हुने गरी कोडेक्स एलिमेन्टेरियस कमिशन, खाद्य तथा कृषि संगठन र विश्व स्वास्थ्य संगठनको प्रस्तावमा सन् २०१८ डिसेम्बर २० का दिन संयुक्त राष्ट्र संघको महासभाले हरेक वर्ष जुन ७ का दिन विश्व खाद्य स्वच्छता दिवस मनाउने निर्णय गरेको थियो ।
यसै सन्दर्भमा नेपालमा जेठ १८ देखि २४ सम्म सप्ताहव्यापि खाद्य स्वच्छता दिवस मनाउने गरिएको छ ।
विश्व स्वास्थ्य संगठनको तथ्याङ्कअनुसार विश्वमा हरेक वर्षमा अस्वस्थकर एवं दूषित खाद्य पदार्थबाट झाडापखाला देखि क्यान्सरसम्म गरि २ सयभन्दा बढी रोग लाग्ने, हरेक दिन १६ लाख मानिस विषाक्त खाद्य पदार्थको उपभोगका कारण विरामी हुने, प्रत्येक दिन पाँच बर्ष मुनिका ३४० जना बालवालिकाको मृत्यु अस्वस्थ खानाको कारणले हुने गर्दछ।
खाद्य श्रृंखलाको विभिन्न चरणमा खाद्य पदार्थको स्वच्छता र गुणस्तर कायम राख्न विभिन्न सरोकारवालाहरुको भूमिकालाई महत्व दिई आ-आफ्नो क्षेत्रबाट उपयुक्त रुपमा सम्बोधन गर्न सम्वन्धित सरकारी एवं गैर सरकारी संघसस्थाहरु, अन्तर्राष्ट्रिय विकास साझेदारी संघसस्थाहरु, खाद्य उद्योगहरु, खाद्य तथा पोषणसँग सम्बन्धित संघसस्थाहरु, उपभोक्ता हकहितसँग सम्बन्धित संघसंस्थाहरुका सहकार्यमा विविध कार्यक्रमहरु सहित खाद्य स्वच्छता दिवस मनाउन लागिएको नेपाल खाद्य बैज्ञानिक तथा प्राविधिज्ञ संघ (NEFOSTA) ले जानकारी दिएको छ ।
यसै अवसरमा आज खाद्य स्वच्छता सप्ताह २०८०, को पहिलो दिन खाद्य प्रविधि तथा गुण नियन्त्रण कार्यालय नेपालगन्ज र खाद्य आयात निर्यात गुणस्तर प्रमाणिकरण कार्यालय नेपालगन्जले कार्यालय परिसर सरसफाई कार्यक्रम गरि सप्ताहको प्रारम्भ गरेका छन्।
साथै यसै सप्ताहमा बिद्यालय सचेतना कार्यक्रम, सुचना प्रचार प्रसार, सरोकारवाला अन्तर्क्रिया कार्यक्रम सहित जेठ २४ गतेका दिन बिहान खाद्य प्रविधि तथा गुण नियन्त्रण कार्यालय नेपालगन्जको आयोजनामा प्रभातफेरी कार्यक्रमको समेत गरिने भएकोछ ।
उक्त प्रभातफेरी कार्यक्रम खाद्य प्रविधि तथा गुण नियन्त्रण कार्यालय नेपालगन्जको प्राङगणबाट सुरु भइ नगरपरिक्रमा गरि कोणसभामा परिणत गरिने जानकारी आयोजकले दिएका छन ।
