बाँके,स्वास्थ्य तथा जनस्वास्थ्य मन्त्री पदम गिरिले सिकलसेल एनिमियाका विरामीले आवश्यक पर्ने औषधि स्वास्थ्य वीमा कार्यक्रममा समावेश गर्ने बताएका छन् । बाँकेमा फैलिएको दादुरा रोगको बारेमा जानकारी लिन नेपालगन्ज आएका मन्त्री गिरिले सिकलसेल एनिमियाका विरामीले पाउँदै आएको उपचार सुविधालाई सर्वसुलभ बनाउन स्वास्थ्य वीमा कार्यक्रममा समावेश गरिने बताए । ‘सिकलसेलका विरामीलाई एकलाख रुपैँया दिनुभन्दा वीमा कार्यक्रममा समेट्दा उपचार प्रभावकारी हुने देखिन्छ,’ पत्रकारले सोधेको जिज्ञाशामा उनले भने, ‘ब्लड प्रेसर, सुगरको औषधि जस्तै सिकलसेलको औषधि पनि वीमामा समेट्न निर्देशन दिइसकिएको छ ।’
उनले धार्मिक तथा सामाजिक कारणले आफ्ना बालबालिकालाई दादुरा विरुको खोप नलगाएका कारण दादुरा फैलिएको बताए । लक्षित समुहका बालबालिकाको घरदैलोमै गएर खोप लगाउने ब्यवस्था मिलाइएको बताए । ‘सवै बालबालिकालाई दादुरा विरुद्धको खोप लगाउने प्रवन्ध गरिएको छ । आवश्यक पर्ने खोप तथा स्रोत, साधनको ब्यवस्था सरकारले गर्ने छ,’ मन्त्री गिरिले भने ।
अर्को एक कार्यक्रममा मन्त्री गिरिले भेरी अस्पताललाई सुविधा सम्पन्न बनाउन राज्यले कुनै कसर बाँकी नराख्ने बताए । भेरी अस्पतालमा जडान भएका थप डायलाइसिस मेसिनको आइतवार उद्घाटन गर्दै उनले भेरी अस्पताललाई भौतिक पूर्वाधार तथा प्रविधियुक्त बनाउने योजना सुनाए ।
उनले सवै नेपालीलाई गुणस्तरिय स्वास्थ्य सेवा प्रदान गर्न राज्यले नीति बनाएको बताए । ‘औषधि उपचारको अभावमा कसैले ज्यान गुमाउन नपरोस् भन्ने उद्देश्यका साथ राज्य अगाडी बढेको छ,’ उनले भने ।
उनले स्वास्थ्य वीमालाई थप प्रभावकारी बनाउने बताउँदै वीमा बापत भेरी अस्पतालले पाउनुपर्ने रकम उपलब्ध गराउन पहल गर्ने आश्वासन दिए । मन्त्री गिरिले भेरी अस्पतालको निरीक्षण समेत गरेका छन् । उनले इमरजेन्सी वार्ड र डायलाइसिस वार्डका विरामीलाई भेटेर अस्पतालको सेवा बारे जानकारी लिएका थिए ।
भेरी अस्पतालका अध्यक्ष प्रमोद धितालको अध्यक्षतामा भएको कार्यक्रममा स्वास्थ्य तथा जनसंख्या मन्त्रालयका सचिव डा. रोशन पोख्रेलले भेरी अस्पताललाई पाँच सय शैयाको बनाउने नीति कार्यान्वयनका चरणमा भएको बताए । ‘भेरी अस्पतालले पठाएको कागजपत्र स्विकृत भएर अर्थ मन्त्रालयमा पठाइएको छ । अर्थ मन्त्रालयले स्विकृती दिने वित्तिकै काम अगाडी बढ्नेछ,’ उनले भने ।
भेरी अस्पतालका प्रमुख मेडिकल सुपरिटेन्डेन्ट डा. बद्रि चापागाईले सरकारले ६ वटा नयाँ डायलाइसिस मेसिन संचालनमा आएपछि दैनिक १८ जना मिर्गौलाका विरामीले डायलाइसिस सेवा पाएको बताए । उनले इमरजेन्सी, हेपाटाइटिस वी र एचआइभी संक्रमण भई मिर्गौला फेल भएका विरामीका लागि एक–एक वटा डायलाइसिस मेसिन छुट्याइएको बताए ।
राज्यको सिमित स्रोत, साधनका बाबजुद भेरी अस्पतालका चिकित्सक र स्वास्थ्यकर्मीले उत्कृष्ट स्वास्थ्य सेवा दिँदै आएको बताउँदै उनले अझ प्रभावकारी सेवाका लागि रकम थप गर्न माग गरे । ‘अवको एक महिना भित्र भेरी अस्पतालले एमआरआइ सेवा संचालन गर्दै छ । यो सेवा संचालन गर्ने भेरी अस्पताल काठमाडौँ बाहिरको पहिलो सरकारी अस्पताल हो,’ उनले भने ।
भेरी अस्पतालका अध्यक्ष धितालले भेरी अस्पतालमा मिर्गौलाका विरामीको फिस्टुला हाल्ने सेवा चाँडै संचालन गरिने बताए । उनले उपकरण र दक्ष जनशक्तिको ब्यवस्था गरि काठ्माडौँ जानुपर्ने बाध्यताको अन्त्य गरिने बताए । ‘फिस्टुला हाल्नका लागि मिर्गौलाका विरामी काठ्माडौँ र भारतको लखनऊ जानुपर्ने बाध्यता छ । विरामीको ब्यथालाई मध्यनजर गरि भेरी अस्पतालले फिस्टुला हाल्ने ब्यवस्था चाँडै गर्दैछ,’ अध्यक्ष धितालले भने ।
भेरी अस्पतालमा भएको कार्यक्रममा स्वास्थ्य कार्यालय बाँकेका प्रमुख सुनिता पौडेलले बाँकेमा दादुरा संक्रमण अझैँ नियन्त्रणमा नआएको बताइन् । उनले दादुरा नियन्त्रणका लागि खोजपड्ताल तथा खोप अभियान जारी रहेको जानकारी गराइन् ।
नेपालगन्ज उपमहानगरपालिकाका स्वास्थ्य महाशाखा प्रमुख रामबहादुर चन्दले दादुराको अवस्था र नियन्त्रणका लागि भइरहेका प्रयासका बारेमा मन्त्री, सचिव लगायतलाई जानकारी गराएका थिए । सो अवसरमा भेरी अस्पताल प्रमुख नर्सिङ प्रशासक दुर्गालक्ष्मी श्रेष्ठले स्वागत गरेकी थिइन् ।
गोचालिखबर बाट साभार
