बाँके– शुशील काेईराला प्रखर क्यान्सर अस्पताल खजुरा, बाँकेमा नवनिर्मित आई.सी. यू कक्ष अब छिट्टै संचालनमा आउने भएको छ ।
मध्यपश्चिम र सुदूरपश्चिमकै सम्भवत पहिलाे पाेजेटिव प्रेशर आई. सी . यू केही दिनभित्रै शुरुवात हुने र सेवा सन्चालनमा आएपछि करीब ४० जिल्लाका क्यान्सर बिरामी लाभान्वित हुने विश्वास गरिएको छ ।
बाँकेको खजुरामा रहेको सुशील कोइराला प्रखर क्यान्सर अस्पताल पश्चिम नेपालका जनतालाई वरदान सावित हुँदै गएको छ। अस्पतालले सेवा विस्तार गरेसँगै क्यान्सर अस्पताल खजुरामा उपचारका लागि आउने बिरामीको चाप बढेको छ।
क्यान्सरको उपचारका लागि छिमेकी देश भारत, भरतपुर क्यान्सर अस्पताल चितवन र वीर अस्पताल काठमाडौँ पुग्नैपर्ने बाध्यताको केही हदसम्म अन्त्य भएको अस्पताल सुपरिटेन्डेन्ट डा.निरज भट्टराईले बताउनु भयो।
उहाँले पश्चिम क्षेत्रका बिरामीले आफ्नै ठाउँमै सुलभ र गुणस्तरीय उपचार सेवा पाउने भएकोमा खुसी ब्यक्त गर्नु भयो ।
अस्पतालका सुपरिटेन्डेन्ट डा.निरज भट्टराई अनुसार अस्पतालमा हाल डिपार्टमेन्टहरू थपिएका छन्। बिशेषज्ञ र विशेषज्ञता अझै विस्तार गर्न जरुरी रहेकाे बताउँदै गर्दा उहाँ क्यान्सर केन्द्रित सेवामा विशेष पहल गरिरहेकाे बताउनुहुन्छ । अहिले यहाँका बिरामीमा ५० प्रतिशत क्यान्सर र ५० प्रतिशत अन्य रोगका छन् । वीर अस्पताल र भरतपुर क्यान्सर अस्पतालमा जाने गरेका बिरामी खजुरा आउन थालेको अस्पतालले जनाएको छ ।
साथै अस्पतालको सेवा प्रभावकारी बनाउन स्थानिय निकाय/ संस्थाहरुसँगकाे सहकार्य र समन्वयमा क्यान्सर अस्पतालसम्म सार्वजनिक यातायातको ब्यवस्था गर्न,एम्बुलेन्स सेवा थप गर्न, स्थायी दरबन्दी स्वीकृत गर्न,सुरक्षाको दृष्टिकोणले हाइमास्ट लाइटको ब्यवस्था गर्न,अक्सिजन प्लान्ट ,ब्लड बैंकको ब्यवस्था गर्न ,क्यान्सर बिरामी लाई निशुल्क खाना खुवाउने कुरामा पहल गरिहेकाे साथै क्यान्सर सेवाको लागि अत्यावश्यक लिन्याक मेसिन छिटोभन्दा छिटो आउने ब्यवस्था गरिसकेको अस्पतालका सुपरिटेन्डेन्ट डा.निरज भट्टराईले जानकारी दिनु भयो ।
