बर्दिया । बर्दियाको बढैयाताल गाउँपालिकामा संचालित विकास निर्माणका ठुला आयोजनाको निर्माण कार्य तिव्रगतिमा अघि बढेका छन् । विगतमा सुस्तगतिमा निर्माण भईरहेका ठुला आयोजना हाल तिव्रगतिमा निर्माण कार्य भईरहेको गाउँपालिकाका अध्यक्ष हिमालय त्रिपाठीले जानकारी दिनुभयो ।
गाउँपालिकाको निरन्तरको ताकेता, समन्वय र सहजिकरणमा सबै आयोजनाको काम सन्तोषजनक ढंगले अघि बढेको त्रिपाठीको भनाई छ । बढैयामा तालमा चार करोड ५० लाखको लागतमा गाउँपालिकाको भवन निर्माण भईरहेको छ ।
यसैगरी ३ करोड ११ लाखको लागतमा शिवचौकदेखि मदन चौक सडक, ५ करोड २१ लाखमा मैनापोखर जगतीया सडक र ५ करोड २६ लाखमा बगोटिया सडक निर्माण भईरहेको छ ।
यसैगरी बढैयातालको ड्याम समेत पालिकाभित्र संचालामा रहेका ठुला आयोजना मध्ये एक आयोजना हो। गाउँपालिकाका प्रमुख प्रशासकीय अधिकृत दान बहादुर ऐडीको नेतृत्वमा सम्वद्ध वडाका वडा अध्यक्ष, इञ्जिनियर तथा प्राविधिक सहितको टोलीले स्थलगत अनूगमन गरी निर्माण कार्यबारे जानकारी लिएको छ ।
अनूगमन समितिले ठेक्का सम्झौता अनुसार समयभित्रै गुणस्तरीय काम गर्न सम्वद्ध निर्माण कम्पनीलाई निर्देशन दिएको छ । बढैयाताल गाँउपालिका पर्यटन प्रबर्द्धन तथा विकासको दृष्टिकोणले पनि देशकै नमुना गाँउपालिका बनाउनेमा लागि परेको अध्यक्ष हिमालय त्रिपाठीले जानकारी दिनु भयो ।
