नेपालगञ्ज, । नेपाल पत्रकार महासंघ बाँके शाखाले पत्रकारहरूलाई सदस्यता वितरण र नवीकरणबाट वञ्चित गरेको भन्दै प्रेस चौतारी नेपाल बाँके जिल्ला समितिले आपत्ति जनाएको छ ।
पत्रकार महासंघ केन्द्रीय समितिले २०७७ चैत २० गते गरेको परिपत्र अनुसार सदस्यता प्राप्त गरेका २४ जना र पुरानो नवीकरण हुनबाट तीन जनालाई वञ्चित गरेको भन्दै चौतारीले आपत्ति जनाएको हो ।
पत्रकारहरूलाई महासंघको सदस्य बन्न र नवीकरण गर्नबाट वञ्चित गरेपछि आज आइतबार बाँके चौतारीले पत्रकार महासंघ बाँकेको ध्यानाकर्षण गराएको छ । ‘नेपाल पत्रकार महासंघ केन्द्रीय समितिको २०७७ चैत २० गतेको परिपत्र अनुसार सदस्यता प्राप्त गरेका (चौबीस जना सदस्य र तीन जना पुरानो नवीकरण) सदस्यलाई नवीकरण गर्नबाट बञ्चित गरिएको र लुम्बिनी प्रदेश समितिको सिफारिसका नाममा केन्द्रीय समितिले बाँके लगायतका जिल्लामा जबर्जस्ती सदस्य स्थानान्तरण गरेको विषयमा प्रेस चौतारी बाँकेको गम्भीर ध्यानाकर्षण भएको छ,’ ध्यानाकर्षण पत्रमा उल्लेख छ ।
तत्कालीन अवस्थामा ‘केन्द्र, प्रदेश र जिल्ला शाखाको निर्वाचन सम्पन्न भएपश्चात कायम हुने गरी सदस्यता अभिलेखीकरण गरिएको’ उल्लेख गरेर ‘सदस्यता नवीकरण गर्नु’ भन्दै केन्द्रले नै सदस्यता दिएका सदस्यलाई हालसम्म पनि विभिन्न बाहना बनाएर नवीकरण गर्नबाट बञ्चित गरिएको चौतारीको भनाइ छ ।
महासंघमा कायम सदस्यलाई नवीकरण गर्न वञ्चित गरेको महासंघले लुम्बिनी प्रदेश समितिको सिफारिसका नाममा केन्द्रीय समितिले बाँकेलगायत जिल्लामा सदस्यता स्थानान्तरण गरेर महासंघले आफनै सदस्यका हकमा दोहोरो चरित्र देखाएको र विभेद गरेको समेत चौतारीले ठहर गरेको छ ।
प्रेस चौतारी जिल्ला अध्यक्ष दुर्गा रोकायाद्वारा हस्ताक्षरित ध्यानाकर्षणपत्र नेपाल पत्रकार महासंघ केन्द्रीय समिति र लुम्बिनी प्रदेश समितिलाई बोधार्थ गरिएको छ ।
